Në qytetin Wu Han, qyteti më i madh në krahinat e Kinës Qendrore, gjendet një "qytet i automjeteve" me përmasa shumë të mëdha. Pikërisht këtu prodhohen veturat e markave të njohura për kinezët, siç janë ato të markave Fukang, Elise, Xsara dhe Pikaso. Ky qytet i automjeteve është vendvendosja e korporatës aksionare të automjeteve DPCA, që është ndërtuar me bashkëpunimin midis kompanisë kineze të automjeteve Dong Feng dhe kompanisë franceze Peugeot Citroen PSA.

Përgjegjësja në korporatën aksionare të automjeteve DPCA, zonja Li Xiao Qing tha në intervistë se këtu kanë qenë toka djerrë edhe para dhjetë vjetëve e ca. Duke i hedhur një sy ndërtimit të kësaj ndërmarrje, ajo tha se kur erdhëm këtu, gjetëm vetëm toka të lëna djerrë. Pra, atëherë kushtet ishin shumë të vështira, megjithatë iu përveshëm menjëherë punimeve të ndërtimit dhe filluam të punonim ditë e natë, duke ushqyer shpresën për zhvillimin e industrisë së automjeteve në vendin tonë. Në shtator të vitit 1995, doli nga linja e prodhimit vetura e parë e markës Fukang. Sa u mallëngyem ne të gjithë! "

Sot në këtë zonë, një tablo e punës intensive ka zëvendësuar pamjen e tokave të dheut të verdhë, dikur të lëna djerrë dhe në heshtje. Në repartin e përgjithshëm të montimit, punëtorët po punonin nxitimthi dhe me rregull nëpër linjat e prodhimit, ku automobilat lëviznin përpara njëri pas tjetrit dhe punëtorët mbërthenin në to pjesët e ndryshme. Veturat e korporatës DPCA marrin formën e vet pikërisht në këtë repart.

Qysh në vitin 1998, korporata DPCA arriti objektivin e saj të parë për prodhimin në vit të 150 mijë veturave dhe 200 mijë motorëve të automobilave. Po në atë vit, në qytetin Xiangfan, që ndodhet në pjesën veriperëndimore të qytetit Uhan, u ndërtua një uzinë e motorëve të automobilave pranë kësaj korporate, uzinë që zë një sipërfaqe prej 500 mijë metrash katrore. Sot korporata DPCA ka një fond prej 7 miliardë yuanësh, të regjistruar, dhe është bërë ndërmarrja e tretë e prodhimit të veturave në Kinë.

Zhvillimi i shpejtë i korporatës DPCA u vlerësua lart nga pala franceze. Drejtori i palës franceze zoti Priser tha në intervistë:

"Unë jam i mendimit se bashkëpunimi midis Kinës dhe Francës është i kënaqshëm dhe me efektivitet të lartë, sepse ky bashkëpunim bashkon epërsitë e të dy palëve, të cilat plotësojnë njëra tjetrën dhe kjo jep efektivitetin më të madh. Unë kam besim të plotë për zhvillimin e ardhshëm të korporatës DPCA. "

Besimi i zotit Priser për tregun kinez të automjeteve ka bazë. Vitet e fundit, krahas zhvillimit të ekonomisë kineze dhe ngritjes së nivelit të konsumit në Kinë, është krijuar një gjendje e mirë e paparë në tregun kinez të veturave. Në vitin 2003, sasia e shitjes së automobilave në Kinë arriti në 4 milionë e 400 mijë, ndër të cilat 2 milionë janë vetura. Parashikohet se në vitin 2004 Kina do t'ia kalojë Gjermanisë përsa i përket kërkesës për automobila dhe do të zërë vendin e tretë në botë.

Sot, krahas prodhimit të veturave të markës Fukang, korporata DPCA ka filluar prodhimin e veturave të markave të tjera, si të markave Elise, Xsara, Pikaso e të tjera. Kur u hodhën në treg, produktet e këtyre markave u mirëpritën nga konsumatorët. Në vitin 2004, kjo ndërmarrje hodhi në treg veturat e markës së re "Peugeot 307", të cilat iu pëlqyen konsumatorëve më shumë. Punonjësit dhe punëtorët e korporatës DPCA e ndiejnë veten shumë të gëzuar, kur parë se produktet e tyre u pëlqyen nga konsumatorët kinezë. Nga ana tejtër, ata kanë pasur leverdi nga efektiviteti i mirë ekonomik. Në repartin e përgjithshëm të montimit, ku puna shkonte me vrull, një punëtor me emrin Feng Gjyn tha se gjendja e mrekullueshme e ndërmarrjes së tyre ia shton atij entuziazmin në punë, ai është i kënaqur për të ardhurat e tij dhe ka ndër mend të blejë një nga veturat e prodhuara me pjesëmarrjen e tij. Ai tha se"Unë punoj me të gjitha forcat. Ne punëtorët e korporatës DPCA kemi të ardhura të konsiderueshme në krahasim me ata të ndërmarrjeve të tjera në qytetin Uhan. Të gjithë punonjësit dhe punëtorët e ndërmarrjes sonë kanë dëshirë të blejnë një nga veturat e prodhuara me duart tona. Edhe unë e kam këtë dëshirë."

Tani korporata DPCA ndodhet përballë shanseve dhe sfidave të reja. Ata kanë parashtruar objektivin strategjik për krijimin e markës së parë të vendit të veturave shtëpiake në Kinë dhe do të përpiqen që, brenda rreth 5 vjetëve, ta shndërrojnë ndërmarrjen e tyre në ndërmarrje të prodhimit të automobilave të klasit të parë në arenën ndërkombëtare me potencial akoma më të madh konkurrues.

Në fillim të vitit 2004, filluan në Uhan punimet e fazës së dytë të korporatës DPCA, që zënë një sipërfaqe prej 6,6 hektarësh. Sipas planit, punimet e fazës së dytë do të përfundojnë në vitin 2006. Siç thotë përgjegjesja në këtë ndërmarrje zonja Li Xiao Qing, atëherë ndërmarrja e tyre do të ketë një kapacitet të prodhimit në vit të 300 mijë veturave dhe 400 mijë motorëve, duke furnizuar konsumatorët kinezë me sa më shumë vetura të tipave të rinj dhe duke u dhënë atyre shërbime edhe më të mira.

Ju flet radio e jashtme e Kinës. Të dashur dëgjues, dhamë reportazhin me titull "Ndërtimi i qytetit të automjeteve në toka djerrë". (Zheng)