Një herë, Çu Huai-vang mbajti në arrest Xhang Ji, kryeministër i shtetit Çin dhe kishte ndër mend ta vriste atë. Por ministri Gjin Shang i shtetit Çu ishte i mendimit se në asnjë mënyrë nuk duhej ta vrisnin Xhang Jinë. Ai iu drejtua zonjës Zheng Siu, të cilën e donte shumë Çu Huaj-vang, dhe e gënjeu duke i thënë: "Xhang Ji është kryeministër me merita të mëdha të shtetit Çin, prandaj ka mundësi që mbreti i Çinit ta marrë atë duke i dhënë mbretit tonë të bijën, e cila është një bukuroshe e vërtetë. Kur ajo të bëhet bashkëshorte e mbretit tonë, ju do të mbeteni e mjeruar dhe biri juaj nuk do të bëhet princ trashëgimtar. Zgjidhja më e mirë është që ju t'ia mbushni mendjen mbretit tonë ta lirojë Xhang Jinë. Mbreti ynë gjithmonë ju dëgjon juve. Metoda e Gjin Shangut dha efekt, Xhang Ji u lirua dhe u kthye në shtetin Çin.

Më vonë, Xhang Ji erdhi përsëri në shtetin Çu, por Çu Huai-vang u tregua i ftohtë ndaj tij. Xhang Ji tha: "Meqenëse ju nuk pranoni këshillat e mia, unë do të shkoj në shtetin Han në veri dhe do t'i drejtohem mbretit të Hanit. Ju do të kërkoni diçka nga shteti Han?" Çu Huai-vang iu përgjigj: "Vendi ynë ka plot flori, margaritarë, rinocerontë dhe elefantë . Çfarë tç kërkoj unë nga shteti Han?" Xhang Ji tha: "Ka diçka që ju nuk dini. Shteti Han i sotëm është toka e shteteve të kalaura Zheng dhe Zhou. Vajzat e atjeshme meritojnë të quhen bukuroshe. Ah! Sa herë që ato dalin para grumbejve të njerëzve, disa njerëz të paditur kujtojnë se ato janë hyjnesha të qiellit që kanë zbritur në tokë." Çu Huai-vang tha: "Vendi ynë është një vend i largët dhe i thjeshtë, ne nuk kemi parë asnjëherë ndonjë vajzë nga fusha qendrore dhe nuk dinim se ato janë aq të bukura. Si është e mundur që unë të mos kem lakmi për femra të bukura!" Pastaj ai i dhuroi Xhang Ji një sasi të madhe margaritarësh dhe iu lut të gjente për atë një bukuroshe të fushës qendrore.

Pasi e morën vesh këtë, mbretëresha Nan dhe zonja Zheng Siu u shqetësuan shumë. Mbretëresha Nan i dhuroi Xhang Ji 1000 liang flori dhe zonja Zheng Siu i dhuroi atij 500 liang flori. Ato iu lutën atij të mos bënte këtë gjë.

Çu Huai-vang shtroi një banket për të përcjellë Xhang Ji. Gjatë banketit, Xhang Ji pyeti: "Pse të mos ftojmë këtu edhe dy zonjat për të pirë raki?" Çu Huai-vang thirri të dy bashkëshortet e tij për ta shoqëruar. Xhang Ji tha papritur: "Unë kam bërë një krim ndaj jush, mbret. Kam qenë në çdo pëllëmbë tokë të botës, por asnjëherë dhe asgjëkund nuk kam parë ndonjë femër të bukur që mund të krahasohet me dy bukuroshet tuaja. Unë ju gënjeva pa dashur, mbret." Çu Huai-vang tha: "Lere atë. Edhe unë kam qenë i mendimit se në botë s'ka ndonjë femër që mund të krahasohet me këto dy bukuroshet e mia."

Të nesërmen, Xhang Ji u nis për në shtetin Çin, duke marrë me vete florinjtë dhe margaritarët që kishte fituar nga Çu Huai-vang dhe nga dy gratë e tij.