Megjithëse ka mbi 700 vjet që Suo Na është përhapur në Kinë, ajo nuk është një vegël muzikore me prejardhje kineze. Suo Na ka ardhur, në fillim, nga rajonet e Persisë dhe të Arabisë së lashtë. Bile emri "Suo Na" vjen nga fjala e gjuhës persie të lashtë "Sur No".

Në shekullin 13-të, Suo Na filloi të popullarizohej në krahinat e Kinës veriore. Duke filluar nga ajo kohë, Suo Na filloi të përdorej gjerësisht në bandën frymore të institucioneve qeveritare lokale dhe në orkestrat e pjesëve teatrore popullore. Në këtë mënyrë, Suo Na është bërë një vegël e pamungueshme muzikore në interpretimin e melodive popullore.

Sapo dëgjuat melodinë me titull "Kullotja e buajve", e cila është një melodi tradicionale e interpretuar me Suo Na. Në këtë melodi përshkruhet një dialog i urtë midis një bariu të vogël e shkathët dhe një vajze të ëmbël fshatare.

Suo Na është e thjeshtë nga struktura. Ajo ka 8 vrima në gypin e drunjtë dhe një bilbil në pjesën e sipërme. Fundi i saj prej bronzi në formë hinke funksionon për të zmadhuar e të zbukuruar tingujt. Sipas madhësisë dhe formës, ka disa lloje Suo Na, si Suo Na e madhe, e mesme, e vogël etj.

Suo Na ka tinguj të lartë dhe kumbues dhe me të luhet shpesh jashtë shtëpisë. Me Suo Na, mund të interpretojmë solo, ansambël dhe melodi shoqëruese bashkë me instrumente të tjera muzikore. Tani në Kinë është më e përhapur Suo Na me diapazon të lartë.

Meloditë e interpretuara me Suo Na janë kryesisht me burim popullor nga operat lokale etj., si dhe me karakteristika fshatare. Në fund të këtij programi, le të shijojmë një solo të interpretuar me Suo Na "Zogjtë këndojnë para feniksit" e cila është përpunuar në bazë të një melodie popullore kineze. Në këtë melodi, përshkruhet një panoramë e bukur natyrore e plot gjallëri. (Çan Yean)