Në kohën e lashtë, shteti Jan, që ndodhej në zonën e sotme të Pekinit dhe përreth tij, kishte nivel të lartë kulturor. Mbretit të tij i pëlqenin veçanërisht punimet e holla artistike. Një ditë, erdhi një mjeshtër arti nga shteti Vei, i cili thoshte se ai kishte gdhendur një femër majmuni në majën e një gjembi. Mbreti i Janit u gëzua shumë kur dëgjoi këtë, prandaj e ftoi mjeshtrin në pallatin mbretëror dhe e gostiti me gjellë dhe raki të mirë, pastaj iu lut atij t'ia tregonte veprën e vet. Por mjeshtri tha: "Në qoftë se doni të shihni veprën time, ju duhet të prisni 6 muaj dhe brenda këtyre muajve ju nuk duhet të hyni në dhomën e fjetjes së mbretëreshës, nuk duhet të pini raki dhe nuk duhet të hani mish. Pas 6 muajve, do të vijë një ditë e mirë, që do të hapet pas shiut dhe do të vëzhgoni me kujdes i fshehur në një qoshe të errët, atëherë femra e majmunit do të fillojë të duket dalëngadalë." Mbreti i Janit nuk bëri gjë tjetër veçse filloi ta mbante dhe ta ushqente mjeshtrin e artit në pallatin mbretëror dhe filloi pritjen gjashtëmujore për të parë atë vepër artistike të mrekullueshme.

Pasi u përhap ky lajm, një farkëtar nga shteti Zheng erdhi në shtetin Jan dhe i tha mbretit të Janit: "Unë, që merrem me prodhimin e thikave, e di mirë se përdorimi i një thike është i domosdoshëm për gdhendjen e çdo vepre artistike. E di gjithashtu se çdo vepër artistike e gdhendur patjetër është më e madhe se thika, me të cilën ajo gdhendet. S' ka asnjë majë gjembi që mund të durojë punimin me thikë, sado e vogël që të jetë. Mjafton të kërkoni dhe të shikoni thikën e tij dhe çdo gjë do të bëhet e qartë."

Të nesërmen mbreti i Janit pyeti mjeshtrin: "Me ç'vegël e ke gdhendur atë femër majmuni në majën e gjembit?" Mjeshtri iu përgjigj: "Me thikë." Mbreti tha: "Unë dua ta shoh thikën tende." Mjeshtri iu përgjigj: "Më falni, thikën e kam harruar në shtëpi." Pastaj u nis menjëherë për në shtëpi gjoja për të marrë thikën, por nuk u kthye më. Vetëm atëherë mbreti i Janit e kuptoi se ai kishte rënë në grackën e një mashtruesi.(Zheng )