Kur themi "periudhën e Pranverës dhe Vjeshtës", kemi parsysh periudhën nga viti 770 para erës së re deri vitin 476 para erës së re në historinë kineze. Në atë periudhë, luftrat e padrejta vazhdonin për vite me radhë, si rrjedhim, shumë shtete të vogla u bënë viktima dhe u zhdukën njëri pas tjetrit.

Shteti Cao, që ndodhej në pjesën perëndimore të Shandongut të sotëm, ishte një shtet i vogël, por megjithatë, edhe monarku i tij Cao Bo-jang kishte deklaruar se ai do të synonte për hegjemoni. Pasi dëgjoi këtë, Song Jing-gong, monark i shtetit fqinj Song, qeshi ftohtë dhe pastaj filloi menjëherë luftën për t'i dhënë mësim shtetit Cao, duke i komanduar personalisht trupat e tij ushtarake. Ai u xhindos nga inati, kur populli i shtetit Cao e mallkoi atë me fjalë poshtruese, prandaj e kapi Cao Bo-jangun, e mori në shtetin Song, e dënoi me vdekje, shpalli zhdukjen e shtetit Cao dhe deklaroi se i gjithë territori i shtetit Cao u përfshi në hartën e shtetit Song.

Shteti Liang, që ishte afër shtetit të fuqishëm Çin, i kalonte ditët gjithmonë me frikë. Për të ngritur vigjilencën e popullit, sundimtari i tij bëri një provë patriotike, duke dhënë papritur alarmin dhe duke njoftuar se trupat ushtarake të shtetit Çin kishin hyrë në vendin e tyre. Banorët, të alarmuar dhe të frikësuar, u arratisën nxitimthi në vende të tjera. Shteti Çin mori vesh se shteti Liang ishte bërë, në përgjithësi, një copë tokë pa njerëz dhe dërgoi trupa për të zënë atë dhe në këtë mënyrë shteti Liang u zhduk.

Shteti Huang, që ishte afër shetit Çu, shtet i madh në jug, ishte gjithmonë i mbrojtur nga shteti Çu, por sundimtari i tij lidhi papritur aleancë me shtetin Çi, që ishte një shtet i madh në lindje. Për këtë, ai u mburr me të madhe duke thënë: "Me të lidhur aleancë me shtetin Çi, ne nuk kemi më frikë nga shteti Çu. Të mbrojtur nga shteti Çi, ne mund të sulmojmë deri në kryeqytetin e shtetit Çu." Pasi i mori vesh këto fjalë, monarku i shtetit Çu u inatos dhe dërgoi menjëherë trupa ushtarake dhe e zhduku shtetin Huang.

Shteti Tan, që ishte afër shtetit Çi, ishte shtet i vogël në lindje. Një herë, monarku i shtetit Çi u nis për vizitë në vende të tjera. Në çdo vend ku ai bënte ndalesa gjatë udhëtimit për vizitë, monarkët e tyre dilnin për ta pritur dhe për ta përcjellë, por shteti Tan mbeti i vetmi vend ku ai kaloi pa u pritur dhe pa u përcjellë. Kjo e zemëroi monarkun e shtetit Çi. Pasi u kthye në vendin e tij, ai dërgoi me padurim trupa ushtarake, të cilat e zhdukën shtetin Tan, vetëm me një natë të luftuar. Tan Xi, monarku i shtetit Tan, mërgoi në shtetin Gjy.