Gjatë periudhës së "Vjeshtës dhe Pranverës" në historinë kineze, shtetet Çi dhe Çu ishin vende të mëdha, që synonin për hegjemoni dhe për këtë arsye ishte krijuar tension në marrëdhëniet midis tyre. Për të zbutur tensionin, shteti Çi do të dërgonte kryeministrin e tij Janci për një vizitë të vullnetit të mirë në shtetin Çu. Monarku Çu Ling-vang u përgatit për të pritur Janci-në, por u dha personave nën varësinë porosi që t'i vinin Jancit disa pengesa, për ta ofenduar atë.

Kur arriti Janci, porta e kryeqyetit të shtetit Çu ishte mbyllur. Janci thirri rojtarët dhe u tha: "Ju lutem, hapeni portën e qytetit ." Një nga rojtarët iu përgjigj: "Hapja e portës kryesore është punë e lodhshme. Meqenëse ju jeni shtatshkurtër, hajde hyni në portën e vogël këtu pranë." Janci e kuptoi se ata e bënin këtë për ta fyer, prandaj zbriti nga qerrja, hodhi disa hapa përpara dhe tha: "Kjo po thoni ju nuk është portë qyteti, por është një zgavër që shërben për hyrjen dhe daljen e qenve. Ata që vizitojnë vendin e qenve mund të hyjnë atje, ndërsa unë kam ardhur për vizitë në shtetin Çu". Rojtarët u detyruan të hapnin portën dhe e lanë Jancin të hynte.

Gjatë takimit me Jancin, monarku Çu Ling-vang deshi prapë ta fyente atë dhe tha duke buzëqeshur: "Mos vallë vendi juaj nuk ka persona të tjerë? Përse ata ju dërguan juve? " Janci buzëqeshi dhe tha: "Vendi ynë ka disa rregulla, në bazë të cilave zgjidhen personat e talentuar dhe me moral të dërgohen në vendet me moral, kurse për të dërguar njerëz në vende mediokër dhe pa moral, s' ka nevojë të bëhen zgjedhje, sepse çdokush mund të dërgohet atyre. Në bazë të rregullave, shteti ynë më dërgoi mua për vizitë në vendin tuaj." Fjalët e tij e zunë Çu Ling-vangun shumë ngushtë.

Një ditë tjetër, Çu Ling-vangu shtroi një banket për nder të Jancit. Ndër kohë, dy ushtarë hynë papritur duke shtyrë një burrë të burgosur dhe njëri prej tyre i raportoi Çu Ling-vangut : "Ky është një hajdut që sapo e kapëm. Ka ardhur nga shteti Çi." Çu Ling-vangu shikoi nga Janci dhe e pyeti me qëllim djallëzor: "Të gjithë njerëzit e shtetit Çi janë të aftë për të vjedhur?" Janci iu përgjigj: "Ka diçka që ju nuk e dini , lartmadhëri. Mandarinat e mbjella në Huainan japin fryte të mëdha dhe të ëmbla; kurse ato të mbjella në Huaibei japin fryte të vogla dhe të tharta. Dhe e dini pse? Sepse uji dhe dheu në zona të ndryshme nuk janë njësoj. Edhe njerëzit ndikohen nga kushtet. Për shembull, disa njerëz veprojnë normalisht në shtetin tonë Çi, por ata shndërrohen në vjedhës pasi vijnë në shtetin Çu. Uji dhe dheu në dy vendet tona paskan ndryshime të mëdha! " Çu Ling-vangu u skuq, vrenjti fytyrën dhe u bërtiti dy ushtarëve: "Shporruni që këtej!"

Çu Ling-vang nuk ia arriti qëllimit për ta ofenduar Jancin dhe filloi me seriozitet bisedimet me të. Të dyja shtetet arritën disa kompromise që çuan zbutjen e tensionit midis tyre.