Fjala "paralimpik" përbëhet nga parafjala "para" dhe mbiemri "limpik". Sipas gjuhës greke, fjala "para" do të thotë barazi, prandaj "paralimpik" do të thotë se Lojërat Olimpike dhe Lojërat Paralimpike janë të barasvlershme.

Komiteti Paralimpik Ndërkombëtar është agjencia ndërkombëtare e sportistëve me të meta fizike që u krijua më 22 shtator të vitit 1989 në Duseldorf të Gjermanisë. Komiteti Paralimpik Ndërkombëtar kontrollon dhe ndihmon zhvillimin e Lojërave Verore Paralimpike, të Lojërave Dimërore Paralimpike, të kampionateve botërore ose rajonale të kontrolluara nga ky komitet dhe të garave të nivelit të lartë të sportistëve me të meta fizike. Si një organizatë ndërkombëtare, tani në Komitetin Paralimpik Ndërkombëtar ka 160 vende e rajone anëtare dhe 5 federata sportive ndërkombëtare. Kryetari i tanishëm i Komitetit Paralimpik Ndërkombëtar Fil Kraven është ish-kryetari i Federatës Ndërkombëtare të Basketbollit për njerëzit me të meta fizike, ai edhe vetë është një njeri me të meta fizike.

Në vitin 1984, Kina mori pjesë për herë të parë në Lojërat Paralimpike të Los Anxhelosit. Pas kësaj, është shtuar shumë numri i sportistëve me të meta fizike të Kinës dhe është ngritur pandërprerë niveli i sportistëve. Por gjatë 20 vjetëve, në sheshin sportiv të Lojërave Paralimpike nuk ka pasur asnjë gjyqtar kinez. Kjo gjendje nuk përputhej me pozitën e Kinës në arenën sportive ndërkombëtare.

Më 18 shtator, gjyqtarja kineze Cai Lin gjykoi ndeshjen e parë të xhudos të Lojërave Paralimpike të Athinës. Ajo është gjyqtarja e parë e Kinës në Lojërat Paralimpike. Në këto lojëra paralimpike ka dy gjyqtare kineze. Krahas Cai Linit, Shi Gui Lan do të gjykojë ndeshjet e pingpongut. Ato janë pedagoge të shkollave të larta të Pekinit. Cai Lini tha se ato janë jo vetëm gjyqtare në sheshin sportiv, por në të njejtën kohë edhe nëpunëse që u shërbejnë sportistëve me të meta fizike.

Cai Lini tha se në të kaluarën, për shkak të mungesës së shkëmbimeve me Komitetin Paralimpik Ndërkombëtar, gjyqtarët kinezë nuk u kushtonin mjaft rëndësi Lojërave Paralimpike dhe nuk dëshironin të marrin pjesë në punët e gjykimit të Lojërave Paralimpike.

Në vitin 2008, do të zhvillohen në Pekin Lojërat Olimpike dhe Lojërat Paralimpike, Kina ka filluar punën për të përgatitur gjyqtarë për Lojërat Paralimpike. Në fakt, sporti i njerëzve me të meta fizike ka karakteristikat e veta, disa rregullore të ndeshjeve kanë pak ndryshime me Lojërat Olimpike. Për të gjykuar ndeshje të Lojërave Paralimpike, gjyqtarët duhet të marrin edukim të posaçëm. Pasi mori edukimin përkatës vitin e kaluar, Cai Lin gjykoi garën e njerëzve me të meta fizike të zhvilluar në Kanada. Për shkak të punës së shquar, ajo fitoi kualifikimin e nevojshëm për të gjykuar ndeshje të Lojërave Paralimpike. (fani)