Tani në botë shtohet gjithnjë e më shumë numri i njerëzve që dëshirojnë të mësojnë gjuhën kineze. Studenti egjiptian Ahmed Sadik, 22-vjeçar, që në vogli dëshironte të mësonte gjuhën kineze. Kur ishte i ri, ai ka parë shumë mallra nëpër dyqane që ishin të prodhimit kinez. Ai filloi të interesohet për Kinën. Pasi u pranua për studime në universitet, ai zgjodhi specialitetin e gjuhës kineze. Pas tre vjetësh, Ahmedi e përvetësoi në përgjithësi gjuhën kineze. Ai tha:

Gjuha kineze është bërë gjuha ime e dytë. Më pëlqen kjo gjuhë dhe është kënaqësi për mua që mund të lexoj revista, gazeta dhe romane kineze.

Krahas zhvillimit të shpejtë ekonomik dhe shtimit të kontakteve të Kinës me botën e jashtme, po shtohet gjithnjë e më shumë numri i të huajve në botë që mësojnë gjuhën kineze. Ata janë të shpërndarë në Azi, Evropë, Amerikë dhe në Afrikë. Ata janë jo vetëm studentët e huaj të specialiteteve të gjuhë-letërsisë, të kulturës dhe të historisë, por edhe shumë studentë të huaj të specialiteteve të ekonomisë, tregtisë dhe të drejtësisë, po fillojnë të mësojnë gjuhën kineze. Ata janë të mendimit se me përvetësimin e gjuhës kineze mund të gjejnë më lehtë punë.

Sipas të dhënave jo të plota, tani në të gjithë botën ka 25 milionë të huaj që po mësojnë gjuhën kineze. Për të provuar nivelin e gjuhës kineze të të huajve, nga viti l99l Kina ka ngritur qendra të provimeve të gjuhës kineze për të huajt. Deri në fund të vitit të kaluar Kina pati ngritur qendra të tilla në 87 qytete të 35 vendeve të tjera të botës. Në këto provime kanë marrë pjesë 330 mijë të huaj.

Zoti Li Kuo Chin, zv-shefi i zyrës Shtetërore të Kinës për mësimdhënien e gjuhës kineze për të huajt, u shpreh se gjithnjë e më shumë të huaj e njohin Kinën nëpërmjet mësimit të gjuhës kineze. Për të forcuar shkëmbimet kulturore midis Kinës dhe vendeve të tjera të botës, për shumë vjet me radhë, zyra e tij ka bërë përpjekje të mëdha për popullarizimin e gjuhës kineze në botë, në mënyrë që gjuha kineze të çohet në botë dhe bota të njihet me Kinën. Ai tha:

Kina përkrah aktivisht dhe i ndihmon vendet e tjera të botës në mësimdhënien e gjuhës kineze. Kina ka dërguar pedagogë të gjuhës kineze në 62 vende të tjera. Kina ka filluar edhe planin e vullnetarëve kinezë për mësimdhënien e gjuhës kineze në vende të tjera të botës.

Krahas kësaj, mësimdhënia e gjuhës kineze ka gjetur edhe përkrahjen dhe bashkëpunimin e gjerë të vendeve të tjera të botës. Në shumë vende, gjuha kineze është përcaktuar si një specialitet jo vetëm në shkollat e larta, por edhe në shkollat e mesme dhe në shkollat fillore.

Pak kohë më parë, sektorët arsimorë të Republikës së Koresë shpallën se nga viti i ardhëshëm deri në vitin 2007, në të gjitha shkollat fillore dhe në shkollat e mesme të Republikës së Koresë të hapet ora e mësimit të gjuhës kineze. Në Japoni ka një milionë njerëz që po mësojnë gjuhën kineze. Në Angli sektorët përkatës, në bashkëpunim me Kinën, kanë redaktuar tekstet mësimore të gjuhës kineze, të cilat përdoren në shkollat e mesme të Anglisë. Në Francë 150 shkolla të mesme kanë hapur orën e mësimit të gjuhës kineze. Ndërsa në SHBA gjithnjë e më shumë njerëz preferojnë të mësojnë gjuhën kineze. ( zhang )