Sia Yshu, ministër i shtetit Çen, mori për grua një princeshë të shtetit Zheng dhe ajo u quajt atje "Siagji". Siagji ishte një bukuroshe e rrallë, por për fat të keq, bashkëshorti i vdiq para kohe, duke lënlë vetëm atë dhe një djalë të parritur, që e kishte emrin Sia Xhengshu. Monarku i shtetit Çen, Çen Ling-gong ia la atij djali të drejtën të trashëgonte titullin dhe postin e babait të tij.

Çen Ling-gong së bashku me dy ministra të tij shkonin shpesh herë për të pirë raki dhe për t'u argëtuar në shtëpinë e Siagjisë. Një mbrëmje, Çen Ling-gong piu shumë dhe i pyeti të dy ministrat e tij: "Si thoni ju? Kujt i ngjan Sia Xhengshu?" Të dy ministrat, gjithashtu, kishin pirë shumë, dhe prandaj iu përgjigjën: "Ha ha, sigurisht ai ju ngjan juve." Djaloshi Sia Xhengshu, që rrinte jashtë dhomës, i dëgjoi fjalët e tyre dhe atij iu duk se ato fjalë përbënin fyerje për të, prandaj i lindi ide e për hakmarrje. Ai u fsheh në stallën e kuajve dhe filloi të priste. Kur Çen Ling-gong doli për të shkuar në nevojtore, djaloshi Sia Xhengshu e qëlloi me shigjetë mu në grykë dhe Çen Ling-gong vdiq aty për aty i mbytur në gjak duke mos marrë dot frymë. Të dy ministrat u trembën dhe ikën për mërgim në shtetin Çu. Edhe princi trashëgimtar i shtetit Çen, i cili gjithashtu ishte i parritur, u frikësua shumë, pasi mori vesh se ishte vrarë babai i tij dhe iku menjëherë për mërgim në shtetin Gjin. Djaloshi naiv Sia Xhengshu e shpalli veten monark të shtetit Çen.

Mbreti Xhuang i shtetit Çu mori vesh këtë lajm dhe i komandoi personalisht trupat e tij gjoja për ndëshkuar shtetin Çen dhe për të shuar rebelimin e Sia Xhengshusë. Me të arritur në kryeqytetin e shtetit Çen, trupat e shtetit Çu e arrestuan Sia Xhengshu, e zvarritën atë jashtë qytetit dhe e dënuan me vdekje, duke e ndarë atë me fuqi të pesë kuajve. Pastaj mbreti Xhuang i shtetit Çu takoi nënën e djaloshit të dënuar me vdekje, por ai menjëherë u tërhoq nga bukuria e saj dhe vendosi aty për aty ta merrte atë si konkubinën e vet. Por ministri i tij Vu Çen, që rrinte pranë tij, kundërshtoi duke thënë: "Jo, lartmadhëria juaj, nuk bën ashtu. Ju keni ardhur këtu për të ndëshkuar krimet e Sia Xhengshusë. Po ta merrni Siagji për grua konkubinë, kjo përbën lakmi për femra të bukura dhe lakmia e tepërt është mëkat." Mbreti Xhuang hoqi dorë nga synimi i tij dhe ia dha bukuroshen Siagji gjeneralit të tij të moshuar Lianyin Sianglao që ta merrte për grua, duke e marrë në shtetin Çu.

Pa kaluar shumë kohë, gjeneral Lianyin Sianglao ra në fushën e betejës dhe Siagji mbeti përsëri vejushë. Ministri Vu Çen, i cili dikur kundërshtoi synimin e mbretit Xhuang për marrjen e Siagjisë për grua, shkoi tek ajo dhe tha: "Tani unë mund t'ju marr ju për gruan time." Ai e çoi fshehurazi Siagjinë në shtetin Zheng, më vonë u arratis nga shteti Çu, shkoi përsëri në shtetin Zheng, ku u martua me Siagjinë dhe më vonë burrë e grua shkuan për t'u vendosur përgjithmonë në shtetin Gjin, ku ai fitoi edhe një post zyrtar.