Në kohën kur shteti Gjin aneksoi shtetin Yu, ministri shumë i talentuar Bai Lisi i shtetit Yu u zu rob. Monarku Sian-gong i shtetit Gjin deshi ta ngarkonte Bai Lisin me detyre të rëndësishme, por ai refuzoi. Kështu që Gjin Sian-gong e përfshiu atë në listën e përcjellësve të pajës së princeshës që do të nisej për në shtetin Çin dhe do të martohej me monarkun Mugong të shtetit Çin. Gjatë rrugës për në shtetin Çin, Bai Lisi u arratis dhe arriti në shtetin Çu. Policia e shtetit Çu kapi Bai Lisi, duke e quajtur atë "spiun" dhe e internoi në zonën Nanhai që të kulloste kuaj.

Pas dasmës së tij, Çin Mugong lexoi listën e pajës së nuses dhe vuri re se një shërbëtor me emrin Bai Lisi kishte humbur. Një funksionar i shpjegoi se kush ishte Bai Lisi. Çin Mugong ishte një monark që i çmonte shumë personat e talentuar, prandaj dha urdhër për ta gjetur medoemos Bai Lisin dhe vendosi ta ngarkonte atë me një detyrë të rëndësishme. Me të marrë vesh se ku ishte Bai Lisi, Çin Mugong vendosi një çmim të lartë për të kthyer Bai Lisin. Por një funksionar tha: "Në asnjë mënyrë nuk duhet të ofrojmë një çmim të tillë të lartë. kështu, shteti Çu do ta kuptojë se Bai Lisi është një person i rëndësishëm, dhe nuk do të na e japë." Pasi kësaj këshille, Çin Mugong dërgoi një peson, i cili u nis për në shtetin Çu, duke marrë 5 copë lëkure dashi, me të cilat do të shkëmbente Bai Lisin.

I dërguari i shtetit Çin arriti në shtetin Çu dhe i tha mbretit Çeng të shtetit Çu: "Ne patëm një shërbëtor me emrin Bai Lisi, por ai u arratis në vendin tuaj. Ne duam ta kthejmë atë në vendin tonë dhe ta dënojmë rreptësisht, si një paralajmërim për shërbëtorët e tjerë." Pastaj ai paraqiti 5 copat e lëkurëve të dashit. Mbreti Çeng kujtoi se Bai Lisi ishte një skllav i kategorisë së ulët që vlente vetëm sa 5 copë lëkura dashi,prandaj porositi ta kthenin atë nga zona Nanhai dhe t'ia jepnin të dërguarit të shtetit Çin.

Pasi Bai Lisi arriti në shtetin Çin, Çin Mugong e ndieu veten shumë të dëshpëruar pasi pa që Bai Lisi ishte një i moshuar. Çin Mugong pyeti dhe mori vesh se Ba Lisi ishte 70 vjeç, pastaj psherëtiu dhe tha: "Gjynah se është tepër i vjetër." Bai Lisi e justifikoi veten duke thënë: "Po të më dërgoni për të kapur një egërsirë, unë jam me të vërtetë tepër i vjetër. Por, po të kërkoni nga unë disa këshilla për të mirën e vendit tuaj, unë jam tamam në moshën e duhur." Çin Mugong u bind dhe ngarkoi Bai Lisin me detyra të rëndësishme, bile, më vonë ai u bë edhe kryeministër dhe dha kontribut të madh për zhvillimin e shtetit Çin.