Sia Gje ishte njeri trupmadh dhe shtatgjatë dhe mund të quhej një kolos. Ai ishte aq i fuqishëm saqë mund të këpuste me dy duart brirë të drerëve, mund të rrëzonte një mur me një të shtyrë, bile mund të përleshej me një tigër ose leopard, pa pasur asnjë mjet në dorë. Ai ishte edhe shumë i zgjuar dhe ua kalonte të gjithëve me mençurinë e tij të shquar. Por, ishte gjynah që fuqinë e tij fizike dhe mençurinë e talentine vet ai nuk i shfrytëzonte për punë të dobishme.

Qysh në fillim pasi trashëgoi fronin e mbretit, Sia Gje pati interes të madh për luftën, sepse atij i dukej se me të luftuar ai mund të fitonte famë në botë dhe të grabiste pasurinë e vendeve të tjera në dobi të vet. Disa vende të vogla, që kishin marrë vesh se Sia Gje rendte pas parasë dhe femrave, i dhuronin vazhdimisht flori, argjend, diamant dhe vajza të bukura, me qëllim që territoret e tyre të mos aneksoheshin nga Sia Gje.

Sia Gje kishte fituar shumë pasuri dhe bukuroshe, prandaj nuk kishte më dëshirë për luftë dhe filloi të gëzonte jetën si i pëlqente. Për të kënaqur ato bukuroshe, ai dha urdhrin që në Luojang të ndërtohej një pallat posaçërisht për ato. Për ndërtimin e atij pallati u deshën 7 vjet, u shpenzuan një sasi e madhe parash dhe u vunë në punë mijëra skllevër, kjo gjë i solli popullit vuajtje të pafund.

Sia Gje nuk i toleronte vërejtjet kritikuese, prandaj dënoi me vdekje të gjithë ministrat që i kishin paraqitur atij këshilla me dorë në zemër të sinqertë, dhe kështu rreth tij mbetën vetëm lajkatarët. Dinastia Sia kishte një shtet vasal me emrin Shang, mbret i të cilit ishte Çeng Tang. Sia Gje kishte marrë vesh se Çeng Tang deklaronte se do të përmbyste Sia Gjen, prandaj e arrestoi atë. Shteti Shang i dhuroi Sia Gjesë shumë gurë të çmuar dhe 10 vajza të bukura dhe kështu Sia Gje liroi Çeng Tang. Më në fund, Çeng Tang e përmbysi dinastinë Sia, që zgjati më se 400 vjet dhe Sia Gje u zu rob. Çeng Tang themeloi dinastinë Shang.