Foto:VCG
Organizatorët e Lojërave Olimpike të Tokios thanë të mërkurën se do ta vendosin në qershor se sa shikues - nëse do të ketë - mund të ndjekin Lojërat, në kohën kur valët e koronavirusit kanë krijuar pasiguri të re.
"Duke shikuar zhvillimin e situatës, në kushtet e varianteve të reja të infeksioneve të brendshme, kemi rënë dakord që vendimi lidhur me numrin e shikuesve në objektet olimpike dhe paralimpike të merret në qershor," thanë organizatorët në një deklaratë.
Ata njoftuan gjithashtu se sportistëve do t'u bëhen testime të përditshme për koronavirusin, nga plani fillestar për testim çdo katër ditë, në përpjekje për të forcuar rregullat lidhur me virusin dhe për të shtuar kështu mbështetjen për Lojërat e shtyra.
Thomas Bach, kreu i Komitetit Olimpik Ndërkombëtar, tha të mërkurën se ai e kuptonte plotësisht vendimin për të shpallur gjendjen e jashtëzakonshme në Tokio për të luftuar pandeminë e koronavirusit dhe se ishte i përkushtuar për të mbajtur Lojëra të sigurta dhe të suksesshme.
Duke folur në fillim të një takimi me organizatorët e "Tokio 2020" për të finalizuar variantin e dytë të "librit të rregullave" për Olimpiadën Verore,
Bach tha: "Ne jemi të gatshëm bashkë me ju të marrim të gjitha masat e nevojshme për të minimizuar rreziqet dhe për ta bërë popullin japonez të ndihet i sigurt".
Më tej ai shtoi: "Përparësia jonë kryesore është shëndeti dhe siguria e të gjithëve - jo vetëm e pjesëmarrësve në Lojërat Olimpike, por, para së gjithash, e mikpritësve tanë të nderuar, popullit japonez."
