Foto nga VCG
Anëtarët e G20-s kanë rënë dakord të rrisin multilateralizmin dhe të shtyjnë krijimin e financimit të zhvillimit për vendet më pak të zhvilluara, në zhvillim dhe ishujt e vegjël në zhvillim, tha një ministër indonezian të dielën në Xhakarta, njofton “Xinhua”.
Angazhimi u përcoll gjatë Grupit të 3-të të Punës për Zhvillimin e G20-s (DWG) të mbajtur në Bali më 10-12 gusht.
“Të gjithë jemi të vetëdijshëm se vendet e G20-s kanë njohuritë, ekspertizën dhe burimet financiare për të ndihmuar në përshpejtimin e rimëkëmbjes dhe elasticitetit në shtetet në zhvillim, më pak të zhvilluara dhe ishuj të vegjël në zhvillim. Ne duhet të shtyjmë përpjekjet tona për të ndërtuar një përparim solid”,- deklaroi ministri i Planifikimit të Zhvillimit Kombëtar të Indonezisë Suharso Monoarfa.
Ai theksoi se në takimin e fundit të DWG u diskutua gjithashtu strategjia për zbutjen e pandemisë Covid-19, promovimin e ndërmarrjeve mikro, të vogla dhe të mesme, si dhe tranzicionin digjital dhe energjetik, veçanërisht në vendet në zhvillim.
Sipas tij, marrëveshja e bërë në takimin e DWG do të jetë një referencë për diskutim të mëtejshëm në Ministerialin e Zhvillimit të G20-s që do të mbahet në ishullin Belitung, provincën e ishujve Bangka Belitung, nga 7 deri më 9 shtator. (Fatosi)
