Foto:VCG
Dhjetë persona, përfshirë pesë zjarrfikës, u plagosën në një zjarr të shkaktuar nga vala e fortë e të nxehtit, në qytetin Palmela të Portugalisë.
Autoritetet lokale njoftuan se një person është shtruar në spital në gjendje të rëndë.
Në shumë rajone të Portugalisë është lëshuar alarmi i kuq për zjarret, me temperaturat që mund të arrijnë deri në 45 gradë celsius, përcjell “Xinhua”.
Situatë problematike me zjarret paraqitet edhe në Kroaci. Flakët përfshinë qarqet Zadar dhe Shibenik-Knin, ku u dogjën dhe rreth 20 shtëpi, fatmirësisht pa viktima.
Darko Dukiç, komandanti i Brigadës së Zjarrfikësve të Qarkut Shibenik-Knin, deklaroi për televizionin kombëtar “RTL” se shumë banorë janë evakuuar dhe qindra zjarrfikës janë angazhuar për të shuar zjarret, që vështirësohet edhe nga prania e erës. (Irma)
