Organet e prokurorisë në të gjithë Kinën ngritën mbi 670.000 çështje gjyqësore me interes publik nga korriku 2017 deri në fund të qershorit 2022, njoftoi Prokuroria Supreme Popullore (SPP), citon “Xinhua”.
Ndër to, 58.000 ishin padi civile dhe 614.000 ishin çështje administrative.
Sipas SPP-së, si rezultat, një total prej rreth 524.000 hektarë toka bujqësore, pyje, ligatina dhe kullota u restauruan, me 9.35 miliardë juanë (rreth 1.4 miliardë dollarë amerikanë) të rikuperuar për restaurimin ekologjik.
Prokuroritë lehtësuan pastrimin e mbi 45.8 milionë tonë mbeturinave shtëpiake dhe të ngurta gjatë pesë viteve të fundit. Përafërsisht 1.82 milionë kg ushqime të falsifikuara dhe të cilësisë së dobët janë konfiskuar, si dhe 60.00 kg barna të falsifikuara dhe kontrabandë.
Kina filloi të ngrejë çështje gjyqësore me interes publik më 1 korrik 2017, pasi legjislatura më e lartë e vendit e futi praktikën në ligj, duke miratuar ndryshime në ligjet e procedurës civile dhe administrative.
Gjatë pesë viteve të fundit, SPP ka nisur gjithashtu fushata të ndryshme mbikëqyrëse duke u fokusuar në fusha duke përfshirë mjedisin ekologjik, sigurinë e ushqimit dhe barnave, si dhe sigurinë në vendin e punës. (Irma)
