Bashkëpunimi dypalësh midis Japonisë dhe Shteteve të Bashkuara nuk duhet të minojë sovranitetin, sigurinë dhe interesat e zhvillimit të Kinës, deklaroi Këshilltari i Shtetit dhe ministri i Jashtëm kinez Wang Yi, gjatë një takimi virtual me ministrin e Jashtëm japonez Yoshimasa Hayashi.
Bisedimet u zhvilluan ditë përpara se Japonia të presë samitin e Dialogut Katërpalësh të Sigurisë, ose Quad, një grup i përbërë nga SHBA, Japonia, Australia dhe India.
Samiti Quad është gjithashtu në axhendën e vizitës së parë aziatike të presidentit amerikan Joe Biden, që fillon të premten, gjatë të cilit do të vizitojë Japoninë dhe Republikën e Koresë.
Wang tha se ndërsa Japonia dhe SHBA janë aleatë, Kina dhe Japonia kanë nënshkruar Traktatin e Paqes dhe Miqësisë. Sipas tij, bashkëpunimi Japoni-SHBA nuk duhet të nxisë konfrontimin e bllokut, aq më tepër të minojë sovranitetin, sigurinë dhe interesat e zhvillimit të Kinës.
Kina shpreson që Japonia do të nxjerrë mësime nga historia me synimin për paqen dhe stabilitetin rajonal dhe të veprojë në një mënyrë të kujdesshme, tha Wang, duke i kërkuar Japonisë që mos të ketë një qasje të gabuar.
Ndërsa ky vit shënon 50-vjetorin e normalizimit të marrëdhënieve Kinë-Japoni, Wang i bëri thirrje Kinës dhe Japonisë që të konsolidojnë themelet politike të lidhjeve dypalëshe dhe të ruajnë miqësinë e fituar me vështirësi të krijuar nga brezat e mëparshëm.
Një ndër prioritet është respektimi i parimeve dhe frymës së katër dokumenteve politike Kinë-Japoni, për të mbajtur marrëdhëniet dypalëshe në rrugën e duhur, tha Wang. Ai u kërkoi gjithashtu të dy palëve që të shfrytëzojnë plotësisht potencialin për bashkëpunim dhe të forcojnë koordinimin në fusha të tilla si ekonomia digjitale dhe ndryshimet klimaterike.
Këshilltari kinez i Shtetit tha se faktorët shpërqendrues në lidhjet dypalëshe duhet të hiqen në kohën e duhur, duke theksuar lëvizjet e fundit negative japoneze për çështjet që kanë të bëjnë me interesat thelbësore dhe shqetësimet kryesore të Kinës.
Disa forca politike nga pala japoneze kanë bërë shpifje dhe sulme të pabaza ndaj Kinës, të cilat minuan rëndë besimin e ndërsjellë dhe themelet e lidhjeve dypalëshe, tha Wang. Ai i kërkoi Japonisë të respektojë angazhimet që ka marrë dhe mos të lejojë përpjekjet për shkatërrimin e forcimit të marrëdhënieve Kinë-Japoni.
Yoshimasa tha se Japonia dhe Kina gëzojnë interesa të gjera të përbashkëta dhe potencial të madh bashkëpunimi dhe ai u bëri thirrje të dy vendeve që të angazhohen për zhvillimin e marrëdhënieve dypalëshe konstruktive dhe të qëndrueshme, sipas konsensusit të arritur midis liderëve të tyre.
“Japonia është e gatshme të punojë me Kinën për të mbajtur komunikime të sinqerta, për të reduktuar keqkuptimet dhe gjykimet e gabuara, për të trajtuar siç duhet çështjet e ndjeshme dhe për të promovuar besimin e ndërsjellë politik”, -tha ai.
