Netqëndrimet e turistëve në Shqipëri në njësitë akomoduese u rritën ndjeshëm në muajt e verës së vitit 2021, duke tejkaluar edhe nivelin e para pandemisë, ndryshe nga Evropa, që pavarësisht rritjes, sërish nuk i arriti nivelet e para kriës, shkruan “Monitor”.
Të dhënat janë bërë të ditura nga statistikat e Eurostat, që publikon shifrat e netqëndrimeve për të gjitha shtetet e Evropës.
Që nga qershori, netqëndrimet e turistëve janë rritur ndjeshëm, për të kulmuar në gusht, me gati 313 mijë net, që është një nivel rekord.
Kjo shifër është 37% më e lartë se gushti i vitit të kaluar dhe 28% më shumë se e njëjta periudhë e vitit 2019, kur vendi shënoi dhe vitin më të mirë turistik, përpara se të dëmtohej nga pandemia.
Lirimi i masave në krahasim me shtetet e tjera të Evropës bëri që në Shqipëri të vinin shumë turistë nga Evropa Lindore, apo dhe shtete të tjera. Në kahun e kundërt, shumë shqiptarë u detyruan që të kalonin pushimet brenda vendin në mënyrë që të shmangnin kërkesat e shumta që duheshin plotësuar për të udhëtuar jashtë.
Për periudhën janar-shtator 2021, kur INSTAT raporton të dhënat, netqëndrimet e turistëve arritën në 985 mijë netë, me një rritje prej 41% në krahasim me të njëjtën periudhë të 2020-s.
Edhe në raport me janar-shtator 2019, netqëndrimet janë rritur me 20%, duke tejkaluar në këtë mënyrë nivelin e para pandemisë.
