Foto: unimediainfo

Foto: unimediainfo

Ambasadorja e Francës në Shqipëri Elisabeth Barsacq deklaroi se mendon që nuk duhet të ketë ndarje të Shqipërisë dhe Maqedonisë së Veriut në procesin integrues në Bashkimin Evropian.

“Në lidhje me këtë çështje, mendoj se duhet ta tejkalojmë idenë se dy vendet mund të veçohen. E di se shumë thonë se meqë gjërat nuk po shkojnë mirë për Maqedoninë e Veriut për shkak të Bullgarisë, atëherë duhen ndarë. Kjo duhet tejkaluar dhe ne duhet të bëjmë maksimumin në mënyrë që të mbahen dy konferencat ndërqeveritare në të njëjtën kohë”, tha ajo në një intervistë për “Euronews Albania”.

Tirana dhe Shkupi zyrtar për vite me radhë po presin nisjen e bisedimeve dhe sipas vlerësimit të Komisionit Evropian, dy shtetet kanë përmbushur të gjitha kushtet.

Por, Bullgaria, shtet anëtar i Bashkimit Everopian, e ka bllokuar këtë proces për shkak të mosmarrëveshjeve që ka me Maqedoninë e Veriut sa i përket historisë dhe gjuhës.

Për shkak se disa shtete po refuzojnë që të ndajnë Shqipërinë nga paketa me Maqedoninë e Veriut, edhe nisja e negociatave me Tiranën zyrtare është bllokuar.

Franca mori më 1 janar kryesimin gjashtëmujor të presidencës së Bashkimit Evropian dhe presidenti francez, Emmanuel Macron, bëri thirrje për një Evropë më të fortë, sovrane dhe të bashkuar. (Fatosi)