Në Shqipëri të hënën nisi viti i ri shkollor 2021-2022. Rreth 500 mijë nxënës u ulën në bankat e shkollave nën thirrjet për të respektuar me rigorozitet masat anti-Covid.
Në klasa është detyrueshme mbajtja e maskave dhe distancimi mes nxënësve.
Komiteti i Ekspertëve që ndjekin ecurinë e pandemisë, vendosi që mësuesit duhet të kenë certifikatë vaksinimi ose test të përjavshëm ndaj Covid-19.
Ministrja e Arsimit, Rinisë dhe Sporteve, Evis Kushi deklaroi se në të gjitha shkollat janë marrë masat për mbarëvajtjen e vitit shkollor.
Ajo ftoi nxënësit të respektojnë masat anti-Covid, duke thënë se shëndeti është elementi më i rëndësishëm në këto kohë pandemie. (Fatosi)
