foto nga VCG
Deri të dielën, rezervuarët e lumit Jance kanë shkarkuar 980 milionë metra kub ujë në rrjedhën e poshtme për të ndihmuar në luftimin e thatësirës më të madhe të vendit, raportoi Grupi Mediatik i Kinës (CMG), duke cituar Ministrinë e Burimeve Ujore.
Shkarkimi është pjesë e një plani më të gjerë të rimbushjes me ujë, duke dërguar gjithsej 1.48 miliardë metra kub ujë në rrjedhën e poshtme të lumit.
Që nga korriku, shumica e zonave të pellgut të lumit Jance kanë përjetuar temperatura të larta të shoqëruara me 45 për qind më pak reshje se në vitet e mëparshme. Sipas ministrisë, rezervuarët e lumit Jance rimbushën me 5.3 miliardë metra kub ujë rrjedhën e mesme dhe atë të poshtme të lumit në periudhën 1-15 gusht.
foto nga VCG
Deri më tani, thatësira ka prekur 2.46 milionë njerëz dhe rreth 2.2 milionë hektarë tokë bujqësore në provincat Sichuan, Hubei, Hunan, Jiangxi dhe Anhui dhe bashkinë e Chongqing-ut.
Më shumë se 809 000 veta kanë pasur vështirësi për t'u furnizuar me ujë të pijshëm në mbarë vendin, treguan të dhënat nga Ministria e Burimeve Ujore. Shumica e tyre janë në provincat e brendshme e jugore.
foto nga VCG
Gjithsej 1.35 miliardë juanë (198 milionë dollarë) janë dhënë për kontrollin e përmbytjeve dhe zbutjen e pasojave të thatësirës që nga 18 gushti, sipas Ministrisë së Financave dhe Ministrisë së Menaxhimit të Emergjencave.
Organet e qeverisjes në nivel province po zgjatin ujësjellësit dhe po kërkojnë burime të reja uji, sipas një raporti tjetër të CMG-së.