Foto: VCG
Tetë partitë jokomuniste të Kinës publikuan një deklaratë të përbashkët të enjten, duke dënuar vizitën e kryetares së Dhomës së Përfaqësuesve të ShBA-së, Nancy Pelosi, në rajonin e Tajvanit.
Qeveria amerikane ka ndërmarrë veprime të gabuara mbi çështjen e Tajvanit dhe ka mbështetur forcat e “pavarësisë së Tajvanit”. ShBA-ja dëmton rëndë paqen dhe stabilitetin në ngushticën e Tajvanit. Vizita e Pelosit është një provokim serioz politik që nënkupton një ndërveprim të nivelit më të lartë midis zyrtarëve të ShBA-së dhe Tajvanit, theksohet në deklaratë.
Partia Demokratike Progresive e Tajvanit nuk pranon të njohë Konsensusin e vitit 1992 dhe bashkëpunon me forcat e huaja për të krijuar kaos, vijon deklarata, duke shtuar se tetë partitë jokomuniste kundërshtojnë me vendosmëri çdo përpjekje a veprim që synon të ndajë Kinën, si dhe çdo ndërhyrje të huaj në çështjen e Tajvanit.
Sipas deklaratës, tetë partitë kanë një traditë të nderuar atdhetarie dhe mbështetin paqen. Ato përkrahin me vendosmëri të gjitha masat e nevojshme të marra nga qeveria kineze për të mbrojtur sovranitetin kombëtar dhe integritetin territorial.
Është aspirata e përbashkët dhe përgjegjësia e shenjtë e të gjithë popullit kinez për të realizuar ribashkimin e plotë të Kinës dhe vendosmëria e qeverisë dhe e popullit kinez është e fortë. Çdo përpjekje për të penguar ribashkimin e plotë të Kinës dhe përtëritjen e madhe të kombit kinez do të dështojë, thuhet në deklaratë.
Deklarata e përbashkët u publikua nga Komiteti Revolucionar i Kuomintang-ut Kinez, Lidhja Demokratike e Kinës, Shoqata e Ndërtimit Demokratik Kombëtar të Kinës, Shoqata Kineze për Promovimin e Demokracisë, Partia Demokratike e Fshatarëve dhe e Punëtorëve Kinezë, Partia "Zhi Gong" e Kinës, Shoqëria "Jiusan" dhe Lidhja e Vetëqeverisjes Demokratike të Tajvanit.
