Kryetari i Unionit të Gazetarëve të Shqipërisë Aleksander Cipa
Aleksandër Çipa është gazetar i njohur shqiptar, i cili njihet si analist dhe opinionist në hapësirën shqiptare. Ai ka realizuar shumë studime dhe kumtesa për çështje të realitetit mediatik. Aleksandër Çipa është kryetar i Unionit të Gazetarëve Shqiptarë si dhe ofron konsulencë drejtuese në disa portale mediatike. Në një intervistë ekskluzive për Radio Ejani zoti Çipa sjell kujtime dhe mbresat nga vizitat e tij në Kinë si dhe bashkëpunimin në fushën e medias midis Shqipërisë dhe Kinës.
CMG: Z.Çipa faleminderit për pjesëmarrjen tuaj në rubrikën Kujtoj.
Aleksandër Çipa: Faleminderit dhe është kënaqësi për mua.
CMG: Ju e keni vizituar dy herë Kinën. Çfarë mbresash keni nga vizita juaj e parë në Kinë?
Aleksandër Çipa: Ka qenë një mbresë e posaçme, ishte një shkelje e parë e territorit të Azisë së largët dhe kuptohet ne kishim një njohje përmes teksteve të letërsisë. Meqë letërsia është një pasion i imi, autorët klasikë kinezë në periudhën e komunizmit në Shqipërië ku gjithmonë intensifikimi I marrëdhënieve kulturore ishte në plan të parë dhe justifikonte dhe në një lloj pikëpamje intensifikonte edhe marrëdhëniet në planet njerëzore. Afeksioni që kishim ndaj botës kineze kryesisht artit, historisë dhe kur them historisë kuptohet për një lloj planeti më vete nëse mund ta përdorim këtë hiperbolë të meritueshme.
Kjo kureshtje e madhe për çdo njeri dhe aq më tepër për një gazetar vinte për të parë dhe mënyrën se si ndiqen diferencat në jetën e komuniteteve njerëzore në marrëdhëniet dhe raportet historike të dy popujve. Si një vizitor, duke qenë me besimin se do të kontaktoja kolegë, kuptohet që kishim akumuluar një lloj përgatitjeje, diçka për ta plotësuar memorien tonë për relacionet, shkëmbimet në planin diplomatik, politik, njerëzor dhe atë kulturologjik.
Në atë periudhë ku bëhet fjalë gjithmonë për vitin 2008, unë kisha dijeni për një fakt shumë interesant që Drejtoria e Përgjithshme e Arkivës së Shqipërisë dhe Drejtoria e Përgjithshme e Arkivave të Kinës kontribuonin përmes një projekti të posaçëm për ndërhyrjen rehabilituese të disa prej dokumentave më autentikë të kulturës shqiptare dhe bëhej fjalë për Kodikët e Beratit. Kjo ka qenë një nga gjërat që më shkaktonte kureshtje. Kuptohet që me vizitën e parë kam qëndruar vetëm në Pekin, ku kam vizituar objektet më të rëndësishme të guidës turistike të kryeqytetit kinez. Ishin një befasi e posaçme, një dimension madhështor i kulturës dhe historisë, ruajtjes së artefakteve kulturore dhe historike të Kinës dhe në mënyrë të veçantë të le përshtypje ndjenja e ngrohtë njerëzore me të cilën të presin, jo vetëm autoritetet zyrtare por dhe qytetarët e thjeshtë. Ne patëm mundësi të vizitonim mjedise të gjëra të jetës urbane dhe asaj sociale në Kinë, e cila ishte një mbresë e shkëlqyer.
Gazetari Aleksandër Çipa
CMG: Cila është mbresa më e veçantë që ju ka mbetur në mendje në vizitën e parë në Pekin ?
Aleksandër Çipa: Ne na bënte përshtypje fakti i një disipline qytetare që ekzistonte në mënyrën si e programonin kohën e një dite pune dhe e një dite në përgjithësi. Ishte një gjë e veçantë dhe kishte një strukturim të natyrshëm të marrëdhënies dhe disiplinës njerëzore dhe ndërqytetare dhe kjo ishte ndoshta përshtypja më e rëndësihme të çdo i huaj dhe sidomos një europiani i bën përshtypje kur shkon në Kinë.
CMG: Besoj se keni pasur dhe bashkëpunime në fushën e medias, duke ditur që Unioni Gazetarëve Shqiptarë që ju drejtoni është nga më kryesorët në Shqipëri për mbështetjen e gazetarëve, por edhe portalet mediatike që ju drejtoni dhe eksperienca juaj e gjatë si gazetar ka bërë ndoshta të keni dhe shkëmbime eksperiencash në këtë fushë.
Aleksandër Çipa: Ka një gatishmëri e cila mbetet konsistente nga struktura mediatike e Kinës, e cila kuptohet që është e ndryshme nga ajo që ka vendi ynë. Në Kinë nuk ka një pluralitet medial, por ka një media e cila është e përgjithshme dhe funksionon, duke ruajtur raportet midis medias qëndrore dhe asaj lokale.
Në Shqipëri kuptohet është një model tjetër. Por gatishmëria e kolegëve kinezë për të qenë informues për gjithë spektrin e çështjeve sociale dhe shoqërore që ka Kina e sotme, më ka bërë përshtypje. Më ka bërë përshtypje gatishmëria e tyre për të dhënë informacion rreth dimensionimit kaq gjigant që ka jeta industriale dhe ajo e zhvillimit infastrukturor të Kinës. Kjo ka qenë një nga mbresat e cila është përforcuar edhe në vizitën e dytë që kam pasur atje.
CMG: Në cilin vit ka qenë vizita e dytë në Kinë dhe cili ishte qëllimi i kësaj vizite?
Aleksandër Çipa: Vizita e dytë në Kinë ka qenë në mars të vitit 2011 kur unë kryesoja delegacionin e gazetarëve nga Europa. Ishte një organizim që bëhej nga Ministria e Jashtme e Kinës dhe në këtë pjesë nga Shqipëria përfaqësohesha vetëm unë si gazetar. Ka qenë me të vërtetë një vizitë e jashtëzakonshme.
Delegacioni nga CRI vizitë në Unionin e Gazetarëve Shqiptarë
CMG: Ndërkohë që para dy vitesh një delegacion i nivelit të lartë të Radios së Jashtme të Kinës (CRI) bëri një vizitë zyrtare në zyrat e Unionit të Gazetarëve Shqiptarë.
Aleksandër Çipa: Ishte një delegacion i nivelit të lartë të Radios së Jashtme të Kinës (CRI) ku vinin njëkohësisht edhe drejtuesit e seksioneve të gjuhës shqipe, polake dhe rumune në selinë e Unionit të Gazetarëve Shqiptarë. Ishte një takim nga më interesantët dhe miqësor, kuptohet që kjo ndodhte në një periudhë kur kontributi i Kinës për mediatizimin në gjuhë të vendeve të rajonit tonë është shumë evident dhe i lëvdueshëm, ndonëse dikur radioja shtetërore shqiptare kishte një praktikë dhe përvojë të tillë, por tashmë ajo është zhbërë.
Kjo është një gatishmëri për të shkëmbyer informacion mediatik, për të vendosur një lidhje bashkëpunuese me organizatat e gazetarëve të rajonit të Europës Juglindore për të përforcuar bashkëpunimin midis palëve dhe për të rritur interesimin për çështjet e rëndësishme të komunitetit të gazetarëve, si dhe të funksionimit të medias. Duhet ta kuptojmë që në industrinë e komunikimit dhe medias Kina është avantgardë, është një vend i cili praktikisht jo vetëm po e përmirëson, por po ndikon fuqishëm për atë që quhet revolucioni teknologjik në media.
U diskutua për këto aspekte dhe natyrisht edhe për çështje substanciale të marrëdhënieve dhe lirive profesionale të realiteteve të ndryshme të botës së sotme.
CMG: Ju drejtoni disa portale mediatike serioze në Shqipëri. Si funksionon puna te këto portale online?
Aleksandër Çipa: Unë ofroj konsulencë drejtuese të dy portaleve dhe njëkohësisht të një rrjeti tjetër portalesh aktualisht tek shtypi.net dhe arbërianews. Gjithashtu këtë kontribut e jap edhe te newsalbania.al dhe disa online të tjera që kanë të bëjnë me Kosovën dhe hapësirën shqiptare në Maqedoninë e Veriut. Është një përpjekje në kuadër të zhvillimit të mediave në hapësirën shqiptare të mund të solidarizohen profesionalisht dhe të krijohet një normë e re etike në proçesin e informimit dhe të raportimit.
Aleksander Cipa si kryesues i delegacionit te gazetareve nga Europa ne Kine
CMG: Në vizitën e tretë që mund të bëni në Kinë cilin qytet do të kishit dëshirë të vizitonit?
Aleksandër Çipa: Hapësira gjeografike e Kinës është nga më të gjërat në botën tonë të sotme. Është e pamjaftueshme për një vizitë që të ezaurosh njohjen dhe shkeljen e territorit kinez. Kina është një vend me kontraste të fuqishme, me kontraste të bukura të natyrës dhe raporteve njerezore. Entitetet e brendshme kineze janë befasi dhe zbulime më vete. Diferenca midis Shangait dhe Pekinit është një diferencë e një qyteti perandorak dhe një qytet që është kozmopolit siç është Shangai dhe në kuptimin e modernitetit ndërtimor dhe infrastrukturor është i pakrahasueshëm. Por në të njëjtin ritëm zhvillues është edhe Guangzhou që është gjithashtu një qytet industrial dhe i dyti për nga rëndësia për ekonominë kineze.
Më kanë lënë mbresa të jashtëzakonshme vizitat e luginave ku jetojnë pakicat, të cilat janë me një kolorit të jashtëzakonshëm etnokulturor dhe të nuancave etnografike, por edhe të kulturës dhe sjelljes si dhe të praktikave zakonore të tyre. Të gjitha këto janë pjesë e pamjaftueshme kohore për ta eksploruar dhe për ta njohur në thellësinë e vet dhe për të zbuluar vërtet ato tipare, të cilat janë aq autentike në territoret dhe në gjeografinë e Kinës.
CMG: Unë ju falenderoj shumë për këtë bisedë të këndshme dhe së fundi një mesazh për të gjithë dëgjuesit e Radio Ejani.
Aleksandër Çipa: Do doja të lëvdoja punën e kolegëve që punojnë për seksionin shqip dhe në përgjithësi të medias kineze, të Radio Ejani dhe të medias online, që ofron një kulturë analitike raportimi dhe një normë të lartë etike të komunikimit mediatik. Kjo vlen si një shembull për gjithë spektrin shumëgjuhësh që aktualisht ka skena mediatike në hapësirën shqiptare. Ky është një kontribut që ndryshe nga transmetimet në gjuhë të tjera, kontribute në redaksi të shteteve të tjera, në rastin kinez ruan besnikërinë e një tradite të krijuar në harkun kohor të më shumë se 30, 40 apo 50 viteve të fundit dhe kjo është një gjë shumë e lëvdueshme.
Intervistoi: Gazmend Agaj
