Si e vetmja komunë nën menaxhimin e drejtpërdrejtë të qeverisë qendrore në brendësi të Kinës dhe porta për në rajonin perëndimor, Chongqing po udhëheq hapjen e zonave të brendshme përmes zhvillimit të saj në vitet e fundit nën drejtimin e presidentit Xi Jinping, i cili ka bërë dy vizita inspektuese në qytetin jugperëndimor.
Foto:VCG
PBB-ja e Chongqing arriti në 2.79 trilionë juanë (412.3 miliardë dollarë) vitin e kaluar, 1.4 herë më shumë se në vitin 2012 dhe një rritje prej 8.3 për qind krahasuar me vitin 2020. Qendra tradicionale industriale tani po kalon në statusin e qytetit inteligjent përmes inovacionit digjital, me mbi 5000 kompani të teknologjisë së lartë që kontribuojnë në 19 për qind të prodhimit industrial të qytetit dinamik.
Falë një mjedisi të shëndoshë socio-ekonomik, Chongqing është bërë një destinacion i kërkuar investimi. Sipas autoriteteve lokale, në pesë vitet e fundit, investimet e huaja janë rritur në 517 miliardë dollarë dhe 312 kompani të “Fortune 500” kanë investuar në qytet.
I vendosur në rrjedhën e sipërme të lumit Yangtze, qyteti prej 31 milionë banorësh krenohet me avantazhet kryesore gjeografike si një pikë kryesore në programin kombëtar të zhvillimit për rajonet perëndimore, si dhe një pikë lidhëse për nismën “Një brez, një rrugë” dhe Brezin Ekonomik të lumit Yangtze.
Gjatë udhëtimit të tij të inspektimit në Chongqing në vitin 2016, presidenti Xi tha se bashkia do të bëhet një qendër e brendshme logjistike ndërkombëtare. Presidenti Xi e vizitoi qytetin përsëri në vitin 2019 dhe tha se duhet të përpiqet të bëjë përparime të reja si pjesë e përpjekjes për zhvillimin e rajoneve perëndimore.
Ai tha gjithashtu se duhet të vazhdojë të jetë një spirancë e zhvillimit të brendshëm, një shtytës në avancimin e nismës “Një brez, një rrugë” dhe një lider në zhvillimin e gjelbër në Brezin Ekonomik të lumit Yangtze.
Ashtu si rajonet e tjera pa dalje në det në perëndim, problemet logjistike e mbajtën Chongqing-un prapa për shumë dekada. Kohët e fundit, bashkia ka investuar shumë në infrastrukturën e transportit. Ai krenohet me një port të madh lumi, një aeroport ndërkombëtar dhe një rrjet hekurudhor që e ka ndihmuar të bëhet një qendër tregtare ndërkombëtare dhe logjistike që lidh Kinën, Evropën dhe Azinë Juglindore.
Duke pasur një strukturë të teknologjisë së lartë dhe menaxhim logjistik, Porti Guoyuan mund të dërgojë mallra duke përdorur transportin intermodal në mbi 200 vende dhe rajone nëpërmjet linjës ekspres Kinë-Evropë dhe Korridorit të Ri Ndërkombëtar të Tregtisë Tokë-Det.
Në maj, një tren i ngarkuar me 60 kontejnerë me pajisje mekanike, komponentë elektronikë dhe pjesë auto u nis nga porti Guoyuan. Pas mbërritjes në Lincang, provincën Yunnan, ngarkesa u transportua për në Mandalay në Myanmar, një udhëtim që shënoi gjithashtu hapjen e një shërbimi të ri ndërkombëtar hekurudhor midis Kinës dhe vendit të Azisë Juglindore. “Rruga e re prej 2000 kilometrash zgjat rreth 15 ditë, 20 ditë më pak se ajo tradicionale dhe redukton kostot e logjistikës me 20 për qind”, -tha Zhang Jun, president i “South Asia Future Investment Group”.
Chongqing është gjithashtu selia e Nismës Demonstruese të Lidhjeve Strategjike Kinë-Singapor, e cila u nënshkrua në vitin 2016. Kjo çoi në projektin e Korridorit të Ri Ndërkombëtar të Tregtisë Tokë-Det, një përpjekje për të përshpejtuar hapjen dhe zhvillimin e vendeve të rajonit perëndimor.
Ai mundëson që mallrat nga rajonet perëndimore të qarkullojnë përmes transportit rrugor, hekurudhor dhe detar, nga vende të tilla si Singapori përmes Rajonit Autonom Guangxi Zhuang. Ai gjithashtu lidh Evropën me Azinë Juglindore, me Chongqing si një qendër kryesore hekurudhore dhe arrin 319 porte në 107 vende dhe rajone.
“Korridori tregtar është një shërbim publik për provincat perëndimore të Kinës dhe vendet e ASEAN-it. Arritjet e pesë viteve të fundit tregojnë se zona ka potencial të madh në nxitjen e integrimit dhe zhvillimit rajonal”,- tha Zeng Jinghua, drejtori i administratës së projektit.
Një tjetër plan zhvillimi rajonal i ofron gjithashtu Chongqing mundësi të reja. Në janar 2020, Brezi Ekonomik Chengdu-Chongqing u bë rajoni i katërt kombëtar kyç pas rajonit të Deltës së lumit Yangtze, Zonës së Madhe të Gjirit Guangdong-Hong Kong-Makao dhe rajonit Pekin-Tianjin-Hebei.
Chengdu, kryeqendra e provincës Sichuan dhe Chongqing po marrin së bashku përgjegjësinë për të udhëhequr zhvillimin me cilësi të lartë në Kinën perëndimore.
Mbrojtja e lumit Yangtze
Yangtze, lumi i tretë më i gjatë në botë, rrjedh për 6300 kilometra nga akullnajat në Rrafshnaltën Qinghai-Tibet deri në Detin e Kinës Lindore në brigjet e Shangait.
Ai ka ushqyer njerëzit që jetojnë përgjatë brigjeve të tij për mijëra vjet dhe është një nga djepet e qytetërimit kinez, i njohur si “lumi mëmë” i Kinës.
Sot, më shumë se 400 milionë njerëz mbështeten tek ai për ujë të pijshëm. I vlerësuar si një motor kryesor ekonomik, Brezi Ekonomik i lumit Yangtze përfshin nëntë provinca dhe dy komuna dhe përbën rreth 40 për qind të popullsisë kombëtare dhe PBB-së.
Megjithatë, zhvillimi ekonomik ka rezultuar në konflikt midis progresit dhe mbrojtjes, pasi çështjet mjedisore, si peshkimi i tepërt, ndotja e ujit dhe erozioni i tokës, po prekin lumin dhe banorët.
Ndërsa afërsisht 691 km e lumit Yangtze kalon përmes Chongqing, qyteti është përqendruar në restaurimin dhe mbrojtjen e mjedisit dhe ka shmangur zhvillimin në shkallë të gjerë, veçanërisht që nga turneu inspektues i presidentit Xi në janar 2016, kur ai i kërkoi bashkisë të bëhet një vend i këndshëm me ujë të pastër dhe male të blerta.
Autoritetet e Chongqing filluan shpejt punën e përmirësimit përgjatë lumit Yangtze dhe degës së tij, lumit Jialing, duke rigjeneruar brigjet ujore, duke optimizuar funksionet buzë lumit dhe duke mbrojtur burimet historike e kulturore.
Për të forcuar mbrojtjen e mjedisit, Chongqing ka vendosur një vijë të kuqe ekologjike prej rreth 2.04 milionë hektarësh tokë. Për të përmirësuar cilësinë e ujit, autoritetet mjedisore kanë ndaluar ndërtimin e impianteve të reja kimike brenda 1 km nga lumi Yangtze dhe degët e tij kryesore. Po ashtu parqet e reja industriale duhet të vendosen të paktën 5 km larg.
Këto nisma tashmë po japin rezultate. Cilësia e ujit në seksionin Chongqing të lumit Yangtze është vlerësuar si “e mirë”, sipas standardeve kombëtare në pesë vitet e fundit.
