Eksperti italian: “Një brez, një rrugë” sjell përfitime reciproke

“Një brez, një rrugë” është me të vërtetë një rrugë trafiku me dy drejtime, duke sjellë përfitime logjistike dhe tregtare për të gjithë pjesëmarrësit e saj, përfshirë Italinë, sipas ekspertit italian të transportit detar Marco Donati. "Kjo rrugë, e cila u ndërtua për të përmirësuar logjistikën, është, si të gjitha rrugët, është e dyanshme. Ajo sigurisht që ndihmon produktet e prodhuara nga Kina të arrijnë në Itali, Evropë, në të gjithë botën, por gjithashtu ndihmon produktet tona të arrijnë një treg të madh në një mënyrë më të shpejtë dhe më të qetë”, shprehet ai.

[Foto: Xinhua]

Nisma e propozuar nga Kina “Një brez, një rrugë” ka një ndikim pozitiv në ekonominë globale në përgjithësi dhe sektorin e logjistikës në veçanti, dhe disa vende, mes tyre Italia, duhet të përdorin potencialin e saj të pasur, ka deklaruar në një intervistë për agjencinë kineze të lajmeve Xinhua në portin italian të Xhenovës, eksperti italian i transportit detar Marco Donati, zëvendësmenaxher i përgjithshëm i China Ocean Shipping Company (COSCO) në Itali.

I lindur dhe i arsimuar në Xhenova, Donati ka punuar me COSCO për më shumë se 30 vjet. Ai e filloi karrierën e tij si agjent dhe tani është zëvendësdrejtor i përgjithshëm i gjigantit kinez të anijeve në Itali. Ai ka qenë një dëshmitar i evolucionit të partneritetit tregtar dhe logjistik të Italisë me Kinën.

Sipas Donatit, nisma kineze “Një brez, një rrugë” ka një rëndësi thelbësore nëse shihet përmes vetë konceptit të saj: sigurimi i një zinxhiri të plotë logjistik për produktet që të arrijnë deri te konsumatorët e tyre përfundimtarë në mbarë botën. Kjo nismë është me të vërtetë një rrugë trafiku me dy drejtime, duke sjellë përfitime logjistike dhe tregtare për të gjithë pjesëmarrësit e saj, duke përfshirë Italinë, vuri në dukje Donati.

[Foto: Xinhua]

Sipas Donatit, tregu kinez ka aq shumë potencial konsumi sa që disa industri italiane nuk do të mund të prodhonin as aq sa për të përmbushur kërkesën atje.

“Disa vite më parë, njerëzit flisnin se sa portokalle të varietetit “ Tarocco” (një varietet i njohur nga rajoni më jugor i Siçilisë në Itali) mund të konsumonin kinezët, por do të ishte një numër kaq i madh sa nuk do të mund të përmbushnim kërkesën dhe të dërgoheshin sasi të tilla portokallesh në Kinë”, shpjegoi Donati.

Sipas mendimit të tij, njerëzit nuk duhet të gabojnë duke menduar se nisma “Një brez, një rrugë” sjell përfitime të njëanshme, vetëm për Kinën. Përkundrazi, Italia mund të përfitonte nga e njëjta mundësi.

“Ne (Italia) duhet të jemi mjaft të zgjuar për të përfituar nga kjo nismë dhe për ta bërë tregun italian shumë më konkurrues”, tha Donati.

Eksperti Donati e ka ngritur tashmë këtë ide gjatë një konvente për nismën kineze “Një brez, një rrugë”, të mbajtur në Senatin italian në maj 2019, kur tha se përmirësimet në logjistikë të sjella nga kjo nismë do të sillnin përfitime si për Italinë ashtu edhe për Kinën dhe se një avantazh i tillë logjistik do të ishte "thelbësor për Italinë për të qenë konkurruese në skenën globale, veçanërisht në dritën e ekonomisë së saj të përqendruar te eksporti.

Sipas tij, nisma “Një brez, një rrugë” ka qenë e dobishme edhe për COSCO-n, pasi kompania ka përmirësuar shërbimet e saj për të përmbushur kërkesat strikte të “Një brez, një rrugë”. Megjithatë, logjistika nuk ka të bëjë vetëm me lëvizjen e mallrave, por edhe me shkëmbimin e ideve dhe kapërcimin e dallimeve kulturore, siç e di mirë Donati, duke qenë ndërmjetësi kryesor midis menaxhimit dhe personelit kinez dhe italian të COSCO-s.

[Foto: Xinhua]

"Ka shumë respekt dhe ekuilibër të ndërsjellë midis të dyve. Gjatë 30 viteve të karrierës sime në Itali, më duhej të isha në gjendje të transmetoja informacionin dhe synimet e palës kineze te i gjithë stafi, në mënyrë që t’i angazhoja të gjithë të rreshtoheshin së bashku në të njëjtin drejtim”, tha ai.

Donati vuri në dukje se COSCO ka ndjekur gjithmonë një koncept "kinez" të rritjes, i cili bazohet në qëndrueshmëri dhe ekuilibër. Kjo mendësi e "rritjes së balancuar" i lejoi degës italiane të COSCO të rigrupohej me sukses, pavarësisht nga të gjitha presionet e jashtme, si kriza financiare e vitit 2008, pa pushuar as edhe një punonjës të vetëm nga puna.

“Partnerët tanë kinezë më kanë mësuar se puna ka gjithashtu një komponent të rëndësishëm social, kështu që kompania duhet të përpiqet të krijojë baza aq solide sa të mos ketë nevojë të pushojë kurrë punonjës nga puna”, tha Donati.

Sipas tij, çelësi i suksesit i COSCO-s qëndron gjithashtu në vënien në praktikë të ideve inovative kineze, duke i përshtatur ato në kontekstin lokal dhe duke i përzier me zgjidhje të shëndosha teknologjike, si sistemet e dixhitalizuara dhe blockchain.

Sipas kompanisë, në vitin 2021, dega italiane e COSCO-s zhvendosi 500,104 njësi ekuivalente me (TEU) kontejnerë midis terminaleve në Itali, Kroaci dhe Algjeri.

Tregtia e Italisë me Kinën u rrit 34.1 për qind nga viti në vit në 2021, duke tejkaluar 73.9 miliardë dollarë amerikanë. Vetëm në tremujorin e parë të 2022, ajo arriti në 19.5 miliardë dollarë, 17.5 për qind më shumë nga viti në vit pavarësisht pandemisë COVID-19, sipas Doganave të Kinës.