Komisioni Evropian ka paraqitur një plan veprimi për promovimin e ekonomisë sociale dhe krijimin e vendeve të punës. Me ekonomi sociale nënkuptojmë atë grup shoqërish, organizatash dhe personash juridikë, si ndërmarrjet sociale, kooperativat, shoqëritë e ndihmës së ndërsjellë, shoqatat jofitimprurëse dhe fondacionet që vendosin njerëzit dhe mjedisin në qendër të misionit të tyre dhe riinvestojnë pjesën më të madhe fitimeve të tyre në vetë organizatën.
Plan Veprimi për ekonominë sociale në BE (Foto Google)
"Çdo ditë, rreth 2.8 milionë subjekte të ekonomisë sociale në Evropë ofrojnë zgjidhje konkrete dhe inovative për sfidat vendimtare me të cilat po përballemi. Ato krijojnë dhe ruajnë vende pune cilësore, kontribuojnë në përfshirjen sociale dhe të tregut të punës të grupeve të pafavorizuara dhe mundësi të barabarta për të gjithë, ndjekin zhvillimin e qëndrueshëm ekonomik dhe industrial, promovojnë pjesëmarrjen aktive të qytetarëve në shoqëritë tona, luajnë një rol të rëndësishëm në sistemet evropiane të mirëqenies dhe rivitalizojnë zonat rurale dhe të shpopulluara”. Me këto fjalë hapet Plani i Veprimit për ekonominë sociale, i miratuar nga Komisioni Evropian.
Bashkimi Evropian ka rreth 2.8 milionë lojtarë në ekonominë sociale, të cilët punësojnë afërsisht 13.6 milionë njerëz dhe ofrojnë zgjidhje për sfidat e mëdha me të cilat po përballen shoqëritë tona. Ato përfshijnë një gamë të larmishme sektorësh dhe formash: nga shërbimet e asistencës së riciklimit dhe kooperativat deri te ndërmarrjet sociale. Mbështetja më e madhe për ekonominë sociale jo vetëm që krijon vende pune, por gjithashtu u lejon organizatave të rrisin ndikimin e tyre social në të gjithë BE-në.
Për këtë arsye, Komisioni Evropian ka paraqitur një plan veprimi që synon të kontribuojë në suksesin e ekonomisë sociale evropiane dhe të nxisë rritjen e organizatave të ekonomisë sociale, duke shfrytëzuar gjithashtu potencialin e tyre ekonomik dhe të punësimit, si dhe të kontribuojë në një rimëkëmbje të barabartë e gjithëpërfshirëse dhe në tranzicionet e gjelbra dhe dixhitale.
Flamujt e Bashkimit Evropian, (Foto Google)
Komisioni Evropian ka propozuar që të ndërhyhet në 3 sektorë të veçantë. Para së gjithash, kuadri politik dhe ligjor është thelbësor për të krijuar kontekstin e duhur për suksesin e ekonomisë sociale. Këtu përfshihen tatimet, prokurimet publike dhe disiplina e ndihmës shtetërore, e cila duhet të përshtatet me nevojat e ekonomisë sociale. Për të adresuar këto çështje, në vitin 2023 Komisioni Evropian pritet të propozojë një Rekomandim të Këshillit të Evropës për zhvillimin e kushteve ligjore për ekonominë sociale.
Ai gjithashtu do të publikojë udhëzime për shtetet anëtare mbi kuadrin tatimor për organizatat e ekonomisë sociale dhe do të lehtësojë aksesin në udhëzimet e ndihmës shtetërore. Plani i Veprimit synon gjithashtu të përmirësojë praktikat e mira në prokurimin publik me përgjegjësi shoqërore dhe të promovojë ekonominë sociale përtej kufijve të BE-së.
Më pas, Plani i Veprimit për ekonominë sociale synon t'u ofrojë organizatave të ekonomisë sociale mundësi për të filluar dhe zgjeruar aktivitetet e tyre, si dhe për rikualifikimin dhe përditësimin e aftësive të punonjësve të tyre. Për periudhën 2021-2027, Komisioni Evropian synon të rrisë mbështetjen e tij përtej 2.5 miliardë eurove të vlerësuara të parashikuara më parë për ekonominë sociale në vitet 2014-2020.
Në vitin 2023 Komisioni Evropian pritet të inaugurojë një portal të ri evropian për ekonominë sociale për të lejuar aktorët e ekonomisë sociale të gjejnë në një vend të gjithë informacionin që u nevojitet për financimin, politikat, trajnimet dhe nismat e BE-së.
Në vitin 2022, do të iniciojë gjithashtu produkte të reja financiare në kuadër të programit “InvestEU” dhe do të përmirësojë aksesin në financa. Në të njëjtin vit, KE-ja do të krijojë gjithashtu një Qendër Evropiane të Kompetencës për Inovacionin Social.
Së fundi, Plani i Veprimit për ekonominë sociale synon të sigurojë njohjen e ekonomisë sociale dhe potencialin e saj, duke e bërë ekonominë sociale më të dukshme, si dhe të përmirësojë njohjen e punës dhe potencialit të saj. Komisioni Evropian do të kryejë aktivitete komunikimi që synojnë të evidentojnë rolin dhe specifikat e ekonomisë sociale dhe do të nisë një studim që synon mbledhjen e të dhënave cilësore dhe sasiore për të kuptuar më mirë ekonominë sociale në të gjithë BE-në.
Ekonomia sociale, (Foto Google)
Përveç shumë nismave të tjera, KE do të organizojë edhe kurse trajnimi për zyrtarët publikë për tema të ndryshme që lidhen me ekonominë sociale dhe do të promovojë ekonominë sociale në nivel rajonal dhe lokal duke nxitur shkëmbimet ndërkufitare.
Sipas Valdis Dombrovskis, zv.kryetar ekzekutiv për Ekonominë në Shërbim të Njerëzve në BE, plani i veprimit për ekonominë sociale i ofron ekonomisë sociale mbështetjen që i nevojitet për të qenë e suksesshme dhe për të dhënë një kontribut edhe më të madh për shoqëritë tona. Sipas tij, në mënyrë të veçantë, nga ulja e barrës burokratike që rëndon mbi disa sipërmarrës socialë në krijimin e vendeve të punës deri te ofrimi i mundësive të reja për rikualifikimin dhe përditësimin e aftësive, ky plan veprimi është thelbësor për të promovuar barazinë e gjelbër dhe tranzicionit digjital, si dhe një rikuperim gjithëpërfshirës nga pandemia.
Eurokomisioneri për Punën dhe të Drejtat Sociale, Nicolas Schmit, deklaron se në sajë të rrënjëve të saj të forta lokale, ekonomia sociale mund të ofrojë zgjidhje novatore për shumë nga sfidat e sotme globale, si ndryshimi i klimës, digjitalizimi dhe përjashtimi social.
Schmit thotë se ekonomia sociale punon me dhe për komunitetet lokale dhe ka një potencial të madh punësimi. Për këtë arsye, sipas tij, ky plan veprimi do t'u mundësojë organizatave të ekonomisë sociale të zgjerojnë aktivitetet e tyre, të njihen dhe të kenë një ndikim edhe më të madh në shoqëri.
Thierry Breton, eurokomisioneri për Tregun e Brendshëm, kujton se ekonomia sociale krijon vende pune dhe rritje që janë afër nevojave të qytetarëve dhe mjedisit të tyre përreth. “Kriza e pandemisë ka nxjerrë në pah edhe qëndrueshmërinë dhe shpikjen e modeleve të biznesit të ekonomisë sociale. Prandaj, për të vazhduar zhvillimin e potencialit dhe kontributit të saj në transformimet e gjelbra dhe digjitale, ne po hyjmë në një rrugë tranzicioni për ekosistemin social dhe të ekonomisë së afërsisë”, -tha Breton.
Ndër veprimet e planifikuara është edhe realizimi i një studimi që harton format e ndryshme të njohjes apo etiketimit të formave të ekonomisë sociale, për të identifikuar praktikat më të mira dhe kriteret e përbashkëta, edhe në fushën e tatimeve, për arritjen e një rekomandimi të Këshillit të Evropës për kushtet për zhvillimin e ekosistemit të përgjithshëm në vitin 2023. Po kështu do të rishikohen rregullat specifike për ndihmën shtetërore dhe për zgjerimin e mundësive të aksesit në prokurimet publike, të cilat sot përfaqësojnë 14% të PBB-së evropiane.
Përgatiti: Irma Paloli
