Muri i Madh, një simbol i kombit kinez, me një gjatësi totale prej më shumë se 21.000 kilometra, ka qenë subjekt i legjendave të shumta gjatë shekujve.
Për një perspektivë të re të Vendit të Trashëgimisë Botërore të UNESCO-s, Muzeu i Murit të Madh të Kinës, i cili ndodhet në seksionin Badaling të strukturës në rrethin Yanqing, në Pekin, do të ketë një ndryshim të madh.
Seksioni Badaling i Murit të Madh/ VCG
Wei Hua, ndihmës kuratori i muzeut, tha: “Muri i Madh është ruajtur për breza të tërë. Si dikush që ka lindur dhe është rritur në këtë zonë, shpresoj që brezi ynë të mund të bëjë më shumë përpjekje për të mbrojtur murin dhe për të integruar më mirë jetët e atyre që jetojnë pranë saj me kulturën e rrënjosur thellë të strukturës”.
Pas përfundimit të punimeve të rinovimit, muzeu pritet të ketë një sipërfaqe prej 16.000 metrash katrorë.
Wei tha se muzeu u mbyll më 6 prill dhe deri më 22 qershor, 5741 relikte kulturore të tij ishin zhvendosur në institucionet kulturore të distriktit të afërt Yanqing.
Wei tha se, i ndërtuar në vitin 1994, ai është një muze kombëtar i klasit të tretë i ndërtuar si pjesë e fushatës patriotike “Duaje Kinën, Ruaj Murin e Madh”, i iniciuar nga ish-udhëheqësi kinez Deng Xiaoping, në vitin 1984.
Muzeu është rreth 400 metra larg nga hyrja e Murit të Madh në Badaling. Megjithatë, ai tërheq shumë më pak vizitorë sesa muri.
Wei tha se në vitin 2019, para se të shfaqej pandemia, Muri i Madh i Badaling mirëpriti rreth 10.35 milionë vizitorë, krahasuar me 460.000 në muze.
“Një vlerësim i përafërt tregoi se vetëm 8 për qind e vizitorëve në seksionin Badaling të murit vizituan muzeun, gjë që nxiti punën e rinovimit”, shtoi ai.
Arkeologët rregulluan relikte në gërmimet në seksionin Huairou të Murit të Madh/ Chen Zhonghua Xinhua
Planifikimi i përgjithshëm për përmirësimet e muzeut nisi në fillim të vitit 2020.
Tang Yuyang, profesor në Universitetin e Inxhinierisë së Ndërtimit dhe Arkitekturës në Pekin, i cili është përgjegjës për projektimin, kaloi një vit, nga gushti 2020, duke hartuar planet e rinovimit.
“Një muze në një vend të Trashëgimisë Botërore është jetik për të ofruar një pasqyrë për të mësuar rreth një lokacioni të tillë. Megjithatë, sipërfaqja e tij dhe ekspozitat në Muzeun e Murit të Madh të Kinës ishin larg nga përmbushja e kërkesave për një vend të tillë”, -tha Tang.
Qëllimi kryesor i rinovimit është të shfaqë më mirë historinë e Murit të Madh dhe të vendosë objekte të gjetura në strukturë nga periudha e shteteve ndërluftuese (475-221 p.e.s.) deri në dinastinë Qing (1644-1911).
Tang tha se njerëzit janë të vetëdijshëm për Murin e Madh, por pak e kuptojnë trashëgiminë e tij. Sipas tij, turistët vijnë në Badaling me qëllim që të ngjiten në mur. Ai theksoi se një muze i mirëkrijuar me një platformë shikimi për Murin e Madh mund të tërheqë turistët.
Duke pasur parasysh afërsinë e muzeut me Murin e Madh, Tang tha se rregullat e mbrojtjes së trashëgimisë po respektohen rreptësisht.
Tang përmendi Muzeun e Akropolit të Ri në Athinë, në Greqi, si një shembull të mirë. I ndodhur pranë Akropolit, me një pamje të drejtpërdrejtë të Partenonit, muzeu qëndron në një vend të gjerë arkeologjik, ku vizitorët shohin gërmimet poshtë përmes një dyshemeje xhami.
“Ne vendosëm që pavarësisht se çfarë lloj qasjeje të dizajnit kemi adoptuar, muzeu dhe peizazhi i Murit të Madh duhet të kombinohen”, -tha ai.
Ai shtoi se pas rinovimit, muzeu gjithashtu planifikon të fokusohet në kërkimin për të çuar përpara frymën e Murit të Madh dhe për të përmirësuar funksionet kërkimore, arsimore dhe komunikuese të institucionit.
Punonjësit e Muzeut të Murit të Madh zhvendosën reliktet në ekspozitë para përmirësimit të muzeut/ Han Jie "China Daily"
Synimi është të kthehet në një qendër për monitorimin e trashëgimisë së Murit të Madh, për të përjetuar kulturën e tij, për të ekspozuar trashëgiminë kulturore jomateriale të strukturës dhe për zhvillimin e produkteve kulturore dhe krijuese të lidhura me to.
Wei tha se propozimet e dizajnit të ri për Muzeun e Murit të Madh të Kinës u kërkuan fillimisht në prill dhe procesi i plotë zgjati tre muaj. Rinovimi synon ta shndërrojë institucionin në një muze kombëtar të cilësisë së lartë.
Tre zona kryesore të vendit do të jenë të hapura për publikun pas rinovimit; një sallë ekspozite, një qendër vizitorësh dhe një institut ndërkombëtar kërkimi dhe shkëmbimi i Murit të Madh, tha Wei, duke shpresuar se me përmirësimin e muzeut do të ketë më shumë vizitorë.
Ndër projektet e planifikuara për përmirësimin e muzeut, më bindësi është një ekspozitë e historisë së Murit të Madh.
Si një mbrojtje kundër grupeve nomade në rajonin verior të Kinës së lashtë, muri u ndërtua nga breza kinezësh që datojnë në periudhën e shteteve ndërluftuese, kur shteti Qi ndërtoi mure prej dheu të ngjeshur për të mbrojtur kufijtë e tij në atë që tani është provinca Shandong.
Dong Yaohui, nënkryetar i Shoqatës së Murit të Madh të Kinës, tha: “Historikisht, Muri i Madh parandaloi numrin e luftërave, duke formuar një mbrojtje të madhe kundër ushtrive kundërshtare. Me përparimin e qytetërimit, muri kishte një funksion ushtarak të reduktuar. Ai luajti një rol shumë më të madh në forcimin e lidhjes midis fermerëve dhe nomadëve. Muri i Madh është një ikonë shpirtërore për kinezët, por shumica e tyre nuk janë të njohur me zhvillimin e tij historik dhe lidhjen e tij me kombin tonë. Muri meriton një plan të mirëmenduar për të shfaqur këto karakteristika”.
Dong tha se ekspertët nga Muzeu i Kryeqytetit në Pekin kanë filluar të hulumtojnë rregullimet kryesore për ekspozitat në vendin e rinovuar, duke shtuar se ai shpreson se vlera kulturore dhe shpirti i Murit të Madh mund të shpjegohet më mirë.
Dong, i cili kaloi vite duke përpiluar librin “Kronikat e Murit të Madh”, bëri thirrje gati 40 vjet më parë për më shumë anëtarë të shoqatës së tij për të mbrojtur strukturën.
Punëtorët riparuan një fragment të dëmtuar të Murit të Madh në vitin 2021/ Chen Zhonghao Xinhua
Këto përpjekje mbrojtëse kanë dhënë rezultat. Në vitin 1984, autoritetet lokale e emëruan seksionin e murit të Pekinit 520 km të gjatë si një vend historik dhe kulturor në nivel qyteti.
Që nga viti 2000, qyteti ka investuar rreth 470 milionë juanë (70 milionë dollarë) në 96 projekte për të mbrojtur këtë pjesë të murit, sipas Zyrës së Trashëgimisë Kulturore Komunale të Pekinit.
Në vitin 2019, autoritetet njoftuan një plan për të mbrojtur dhe zhvilluar seksionin e Pekinit të Murit të Madh, duke propozuar që deri në vitin 2035 struktura dhe ndërtesat e saj ndihmëse të jenë pa rrezik.
Në nivel kombëtar, autoritetet qendrore njoftuan një plan në dhjetor 2019 për të krijuar parqe kulturore të Murit të Madh, me Muzeun e Murit të Madh të Kinës të cilësuar si një nga projektet kryesore.
Muri i Madh u rendit si një sit i Trashëgimisë Botërore nga UNESCO në vitin 1987 dhe seksioni Badaling është vizituar nga më shumë se 500 udhëheqës shtetesh që nga viti 1954.
Dong, nga Shoqata e Murit të Madh të Kinës, tha: “Muri është një dritare për të gjitha vendet në botë për të kuptuar Kinën. Ai mund të përcjellë në mënyrë eksplicite vizionin e popullit kinez për zhvillim paqësor dhe frymën e të qenit trim dhe këmbëngulës”.
“Vlerat thelbësore të kombit tonë mund të forcojnë besimin e popullit kinez. Një kulturë e thellë bashkon gjithashtu popullin tonë. Muri i Madh ka dëshmuar paqen që kemi ndërtuar gjatë viteve, e cila ka vlerë dhe rëndësi të madhe për kombin. Puna për rinovimin e Muzeu të Murit të Madh të Kinës duhet të theksojë më shumë vlerën shpirtërore të murit dhe të tregojë historinë 5000-vjeçare të kombit kinez”, -tha Dong.
