Presidenti kinez Xi Jinping u bëri thirrje vendeve të BRICS-it të krijojnë komunitetin e fatit të përbashkët, si një përpjekje për të forcuar bashkëpunimin dhe për arritjen e begatisë së përbashkët. Ai e bëri këtë thirrje gjatë fjalimit të mbajtur në Samitin Vjetor të këtij blloku, për forcimin e tregut, mbajtur në qytetin rus Ufa.

Partneriteti i vendeve të BRICS-it është tema e sivjetme e samitit të pesë ekonomive në zhvillim, Brazilit, Rusisë, Indisë, Kinës dhe Afrikës së Jugut. Takimi zhvillohet pas një ngadalësimi ekonomik të vendeve të BRICS-it si dhe të ekonomive të tjera në zhvillim.

Banka e Zhvillimit të Ri e BRICS-it me një kapital prej 100 miliard dollarësh amerikanë dhe Kontingjenti Rregullator i Rezervës me një tjetër kapital prej 100 miliard dollarësh, përbëjnë rezultatet e mëdha konkrete të takimit të Ufa-s.

Banka e Zhvillimit të Ri pritet të miratojë projektet e saj inauguruese të investimeve në fillim të vitit 2016. Përveç bashkëpunimit ekonomik, liderët e vendeve të BRICS-it diskutuan dhe çeshtje globale si lufta kundër terrorizmit, abuzimi me drogat dhe siguria kibernetike. Në përfundim të takimit liderët e BRICS-it miratuan Deklaratën e Ufas dhe një plan veprimi. (Eda Merepeza)