foto nga CFP
Qeveria kineze publikoi të mërkurën udhëzime për të promovuar zhvillimin me cilësi të lartë të udhëtimeve arsimore në fushën e arkeologjisë. Këto udhëzime nxjerrin në pah përfitimet e përdorimit të burimeve të bollshme arkeologjike të Kinës për qëllime arsimore, shkruan “Xinhua”.
Sipas udhëzimeve, udhëtimi arsimor është i favorshëm për ruajtjen dhe promovimin e kulturës tradicionale kineze, si dhe për rritjen e diturive shkencore dhe shpirtit humanist të publikut.
Udhëtimi arsimor, i njohur gjithashtu si udhëtim studimor, kombinon arsimin dhe turizmin për t'iu ofruar studentëve mundësi për t'u përfshirë në përvojat praktike edukative dhe mësimin e bazuar në kërkime jashtë mjedisit tradicional të klasës.
Departamentet administrative provinciale të relikteve kulturore janë udhëzuar të hartojnë dhe publikojnë një listë të vendeve të përshtatshme për udhëtime studimore arkeologjike. Institucionet e përfshira në arkeologji, duke përfshirë parqet e zonave arkeologjike, muzetë, institutet kërkimore dhe vendet e gërmimeve, inkurajohen të organizojnë aktivitete edukative udhëtimi, sipas udhëzimeve.
foto nga CFP
Për të siguruar cilësinë e udhëtimit studimor arkeologjik, Administrata Kombëtare e Trashëgimisë Kulturore do të mbikëqyrë certifikimin e bazave të kualifikuara dhe do të përfshijë një udhëtim të tillë në zhvillimin dhe funksionimin e parqeve kombëtare të zonave arkeologjike dhe muzeve përkatëse.
Administrata do të mbështesë gjithashtu krijimin e organizatave të industrisë të dedikuara për udhëtimet studimore arkeologjike, me qëllim përmirësimin e zhvillimit të kurrikulës, dizajnit dhe vlerësimit të mentorëve.
Për më tepër, udhëzimet theksojnë rëndësinë e prioritetit të mirëqenies publike në udhëtimet studimore arkeologjike. Duhet të bëhen përpjekje për të ofruar produkte dhe shërbime më të përballueshme që synojnë të rinjtë, duke ofruar gjithashtu ulje të përshtatshme tarifash për grupe të veçanta, si familjet me të ardhura të ulëta.
foto nga CFP
Departamenteve administrative të relikteve kulturore në të gjitha nivelet u kërkohet të monitorojnë nga afër objektet, vizitorët dhe aktivitetet që lidhen me vizitat studimore, duke marrë masat e nevojshme për të korrigjuar çdo problem, ose për të pezulluar operacionet nëse është e nevojshme.
55 parqet kombëtare të siteve arkeologjike të Kinës patën mbi 67 milionë vizitorë në vitin 2023, një rritje prej 135 për qind krahasuar me një vit më parë.(Elona)
