Foto nga VCG
Presidenti i Kinës Xi Jinping u takua të hënën pasdite në Pekin me kryeministrin e Norvegjisë Jonas Gahr Store, i cili ndodhet për një vizitë zyrtare në Kinë.
Presidenti Xi i kërkoi kryeministrit Store t'i përcjellë përshëndetjet e tij mbretit Harald V dhe vuri në dukje se gjatë 70 vjetëve që nga vendosja e marrëdhënieve diplomatike ndërmjet Kinës e Norvegjisë, të dy popujt e kanë respektuar dhe vlerësuar njëri-tjetrin, si edhe kanë mësuar nga njëri-tjetri, duke krijuar një miqësi të çmuar. Zhvillimi i mëtejshëm i bashkëpunimit miqësor kino-norvegjez është në përputhje me vullnetin e të dy popujve dhe interesat themelorë të të dy vendeve, si edhe me prirjen e përgjithshme të lidhjeve më të ngushta ndërmjet vendeve në mbarë botën. Aktualisht, bota po kalon një situatë të ndërlikuar dhe bashkësia ndërkombëtare gjendet përpara provës nëse mund të bëjë zgjedhjen e duhur. Kina do të vazhdojë të ndjekë rrugën e zhvillimit paqësor dhe, duke thelluar më tej reformat e duke promovuar modernizimin e stilit kinez, do të sjellë qëndrueshmëri e siguri në botën kaotike dhe do të krijojë më shumë mundësi për zhvillimin e përbashkët të të gjitha vendeve. Kina është e gatshme të punojë me Norvegjinë për të promovuar zhvillimin e vazhdueshëm të bashkëpunimit miqësor dypalësh.
Kreu i shtetit kinez theksoi në vijim se, duke i hedhur një vështrim historisë 70-vjeçare të marrëdhënieve ndërmjet Kinës e Norvegjisë, vëren se miqësia dhe bashkëpunimi janë motivi kryesor. "Përvoja historike tregon që, për të ruajtur zhvillimin e qëndrueshëm dhe të shëndetshëm të marrëdhënieve dypalëshe, gjëja më e rëndësishme është të respektojmë njëri-tjetrin dhe të kërkojmë gjuhën e përbashkët duke lënë mënjanë dallimet, duke përfshirë respektimin e interesave thelbësorë dhe përkujdesin për shqetësimet kryesore të njëri-tjetrit," theksoi ai.
Më tej Xi shtoi që Kina e Norvegjia kanë konsensus të gjerë për ruajtjen e paqes dhe sigurisë botërore, përballimin e ndryshimeve klimatike, mbrojtjen e biodiversitetit etj. Kina është e gatshme të forcojë komunikimin dhe bashkëpunimin me Norvegjinë në platforma shumëpalëshe, si Kombet e Bashkuara, të praktikojë multilateralizmin e vërtetë dhe të promovojë një shumëpolarizim të barabartë dhe një globalizim ekonomik që krijon përfitime për të gjithë. Ai shprehu shpresën se Norvegjia do të luajë një rol aktiv në promovimin e zhvillimit të shëndetshëm dhe të qëndrueshëm të marrëdhënieve Kinë-BE.
Nga ana e tij, kryeministri i Norvegjisë Jonas Gahr Store përcolli përshëndetjet e përzemërta të mbretit Harald V për presidentin Xi Jinping, duke vënë në dukje se Norvegjia ishte një ndër vendet e para nordike që vendosi marrëdhënie diplomatike me Republikën Popullore të Kinës. Që nga vendosja e lidhjeve diplomatike ndërmjet Norvegjisë dhe Kinës, marrëdhëniet ndërmjet të dy vendeve janë zhvilluar mirë dhe të dy palët kanë zhvilluar dialog e bashkëpunim me respekt të ndërsjellë. Norvegjia respekton sovranitetin e Kinës, i përmbahet politikës së "një Kine" dhe është e gatshme që, bashkë me Kinën, të vazhdojnë respektimin e interesave thelbësorë dhe shqetësimeve kryesore të secilit vend, të mësojnë nga njëri-tjetri, të komunikojnë e të mësojnë nga njëri-tjetri dhe të arrijë përfitime të ndërsjella. Zhvillimi i Kinës është plot gjallëri dhe ka shumë përvoja të suksesshme që ia vlen të mësohen, vuri në dukje ai, duke shtuar se Norvegjia mirëpret të zgjerojë bashkëpunimin me Kinën, veçanërisht në fushat e zhvillimit të gjelbër, përballimit të ndryshimeve klimatike, transportit detar, bujqësisë dhe peshkimit, automjeteve me energji të re, inteligjencës artificiale etj. Kina luan një rol të rëndësishëm në zgjidhjen e shumë sfidave globale me të cilat përballet bota sot dhe në përgjigjen ndaj problemeve kryesore që lidhen me paqen dhe sigurinë ndërkombëtare. Norvegjia mbështet tregtinë e lirë dhe është e gatshme të forcojë komunikimin dhe bashkëpunimin me Kinën në kornizat shumëpalëshe si G20, dhe mbështet forcimin e bashkëpunimit ndërmjet BE-së dhe Kinës, shtoi kreu i qeverisë norvegjeze.
Të dy palët shkëmbyen mendime për çështje të nxehta, si kriza e Ukrainës. Xi Jinping-u theksoi se Kina inkurajon dhe mbështet të gjitha përpjekjet për zgjidhjen paqësore të krizës dhe do të vazhdojë të këmbëngulë në promovimin e paqes dhe të bisedimeve, duke luajtur një rol konstruktiv në promovimin e zgjidhjes politike të krizës ukrainase. Ai shprehu shpresën që të gjitha palët do të punojnë së bashku për të krijuar kushte të favorshme për zgjidhjen politike të krizës nëpërmjet dialogut. (Çang Çuo)
