Inteligjenca artificiale (Foto Atsh)

Studiuesit e Universitetit të Bostonit kanë krijuar një program të ri, i cili pritet që përmes inteligjencës artificiale të diagnostikojë Alzheimerin, gjashtë vjet përpara fillimit të simptomave, duke ekzaminuar të folurën e pacientit, shkruan “ATSH”.

Programi i tyre mund të parashikojë, me një normë saktësie prej 78.5%, nëse një person me dëmtim të lehtë kognitiv do të mbetet i qëndrueshëm gjatë gjashtë viteve të ardhshme apo do të zhvillojë demencë.

Për të ndërtuar dhe trajnuar modelin e tyre, studiuesit përdorën të dhëna nga një prej studimeve më të vjetra dhe më të gjata të vendit.

Pjesëmarrësit që tregojnë shenja të rënies kognitive i nënshtrohen testeve dhe intervistave të rregullta neuropsikologjike, duke prodhuar një sërë informacionesh për mirëqenien e tyre njohëse me kalimin e kohës.

Ekspertët morën regjistrime audio të 166 intervistave me njerëz, të moshës 63-97 vjeç, me dëmtime të lehta kognitive. 76 prej tyre mbetën të qëndrueshme gjatë gjashtë viteve në vijim dhe 90 u përkeqësuan në mënyrë progresive. Më pas ata përdorën një kombinim të mjeteve të njohjes së të folurit dhe inteligjencës artificiale, për të të dalluar lidhjet midis të folurit, demografisë, diagnozës dhe përparimit të sëmundjes.

Pas trajnimit të programit, studiuesit testuan aftësinë e tij parashikuese te pjesa tjetër e pjesëmarrësve.

Modeli funksionon vetëm në bazë të përmbajtjes së intervistës dhe mënyrës se si janë strukturuar fjalitë. (Irma)