Kancelari gjerman: Nuk mund të vihet paralele mes Izraelit dhe Hamasit
2024-05-23 10:48:21

Foto nga VCG

Kancelari gjerman, Olaf Scholz, ka hedhur poshtë çdo paralelizëm midis luftës së Izraelit dhe mizorive të Hamasit pas veprimit të Gjykatës Ndërkombëtare Penale për të ngritur akuza për krime lufte kundër liderëve të Izraelit dhe militantëve palestinezë.

“Qeveria gjermane refuzon në termat më të fortë çdo pikëpamje krahasueshmërie”,- deklaroi zëdhënësi i kancelarit gjerman, shkruan “ATSH”.

Të hënën, kryeprokurori i GJNP-së, Karim Khan, tha se ai po kërkon urdhra arresti për kryeministrin izraelit Benjamin Netanyahu, ministrin izraelit të Mbrojtjes, Yoav Gallant, dhe udhëheqësit e lartë të Hamasit.

Urdhërarrestet kanë të bëjnë me krimet e luftës dhe krimet kundër njerëzimit të kryera në Izrael dhe Rripin e Gazës.

Udhëheqës të tjerë të Hamasit të emëruar nga Khan përfshijnë Mohammed Diab Ibrahim al-Masri, i njohur zakonisht si Mohammed Deif, kreu i krahut ushtarak të Hamasit dhe Ismail Haniyeh, në krye të krahut politik të Hamasit dhe shihet si udhëheqësi i përgjithshëm i grupit.

Lidhur me urdhërarrestet e mundshme për Netanyahun dhe Gallant, Scholz tha se qeveria gjermane ka theksuar gjithmonë se Izraeli ka të drejtë të mbrohet nga sulmet vrasëse nga Hamasi në përputhje me ligjin ndërkombëtar. (Elona)