Gjykata e Hages (Foto Panorama)

Gjykata Ndërkombëtare e Drejtësisë nisi seancat e dëgjimit për kërkesën e Afrikës së Jugut, që t’i bëjë presioni Izraelit të ndalë operacionin ushtarak në qytetin jugor të Gazës, Rafah, ku u strehuan më shumë se 1.4 milionë banorë, raporton “Panorama”.

Kjo është hera e katërt që Afrika e Jugut i kërkon Gjykatës Ndërkombëtare të Drejtësisë masa urgjente qëkur kombi nisi procedurat duke pretenduar se veprimi ushtarak i Izraelit në luftën e tij me Hamasin në Gaza përbën gjenocid.

Sipas kërkesës së fundit, urdhrat e mëparshëm paraprakë të Gjykatës së Hagës nuk ishin të mjaftueshme për të adresuar një sulm brutal ushtarak në strehën e vetme të mbetur për popullin e Gazës.

Izraeli e ka portretizuar Rafahun si bastionin e fundit të Hamasit, duke hequr dorë nga paralajmërimet nga SHBA-ja dhe aleatët e tjerë se çdo operacion i madh atje do të ishte katastrofik për civilët.

Afrika e Jugut i ka kërkuar gjykatës të urdhërojë Izraelin të tërhiqet nga Rafahu, të marrë masa për të siguruar qasje të papenguar për zyrtarët e OKB-së, organizatat humanitare dhe gazetarët në Rripin e Gazës, si dhe të raportojë brenda një jave se si po i përmbush këto kërkesa.

Gjatë seancave dëgjimore në fillim të këtij viti, shteti izraelit mohoi fuqimisht kryerjen e gjenocidit në Gaza dhe bëri të ditur se po bën gjithçka që mundet për të kursyer civilët dhe po synon vetëm militantët e Hamasit. (Irma)