Shefi për Politikën e Jashtme dhe Sigurinë në BE, Josep Borrell/ foto nga CFP

Shefi për Politikën e Jashtme dhe Sigurinë në BE, Josep Borrell, i ka kërkuar Lindjes së Mesme që mos të kthehet në 20 vjet pas me cikle të përsëritura dhune dhe konfliktesh. 

Ai i bëri thirrje Izraelit që mos të kaplohet nga zemërimi në përgjigjen e tij pas sulmit të Hamasit më 7 tetor, shkruan “RTSH”. 

Kreu i diplomacisë europiane vizitoi gjatë fundjavës Bregun Perëndimor, Bahreinin, Katarin, Bahreinin, Arabinë Saudite dhe Jordaninë. 

“Gjëja e rëndësishme sot është që duhet të angazhohemi në një proces paqeje. Nëse nuk e ndalojmë këtë cikël dhune, do të ndodhë përsëri dhe tani ka një mundësi, një lloj thirrje zgjimi për t'u marrë me problemin që pothuajse e kemi harruar”, u shpreh Borrell. 

Sipas tij, paqja me botën arabe nuk mjafton pasi paqja duhet të bëhet me vetë palestinezët.  Ai theksoi se gjëja e parë që duhet bërë është të mendohet se si të menaxhohet situata në Gaza.  (Elona)