Foto RTSH

Bashkimi Europian do të sigurojë 110 milionë euro shtesë ndihmë humanitare për ukrainasit e prekur nga konflikti me Rusinë, njoftoi Komisioni Europian.

“Ndërsa raketat ruse bëjnë kërdinë në Ukrainë, komuniteti humanitar duhet të jetë i gatshëm të ndihmojë njerëzit më të cenueshëm të prekur gjatë muajve të ashpër të dimrit”, - theksoi komisioneri Europian për Krizat, Janez Lenarcic.

“Financimi i ri synon ndihmën në para, ushqim, ujë, strehim, kujdes shëndetësor, mbështetje psikosociale dhe mbrojtje”, - theksoi komisioni, citon “ATSH”.

BE do të dërgojë gjithashtu gjeneratorë shtesë të energjisë në Ukrainë.

Komunitetet e cenueshme në Ukrainë do të marrin 100 milionë euro, 10 milionë euro do të shkojnë për refugjatët ukrainas në Moldavi.

Angazhimi i fundit e çon ndihmën humanitare të BE-së në Ukrainë në 843 milionë euro. (Elona)