foto: VCG

Një oficer i ushtrisë ukrainase dyshohet se ka organizuar sulmin e vitit të kaluar ndaj tubacionit të gazit natyror Nord Stream, sipas gazetës Washington Post, e cila ka cituar burime anonime në Ukrainë dhe Evropë.

Askush nuk e ka marrë përgjegjësinë për shpërthimet e shtatorit 2022, në ishullin danez të Bornholmit, që dëmtuan tre nga katër tubacionet nën Detin Baltik, që përdoreshin për tranportin e gazit natyror rus në Evropë.

Gjermania, Danimarka dhe Suedia kanë nisur hetimet për shpërthimin në tubacionin “Nord Stream”, që çliroi shtëllunga metani në atmosferë për disa ditë me radhë.

Më 26 shtator 2022, tre shpërthime shkaktuan rrjedhje masive të gazit natyror në tubacionet “Nord Stream 1” dhe “Nord Stream 2”. Sulmi la të paprekur vetëm një nga katër tabacionet e gazit në rrjet.