CFP

Drejtoresha ekzekutive e Fondit të Kombeve të Bashkuara për Fëmijët (UNICEF), Catherine Russell, deklaroi në Këshillin e Sigurimit të OKB-së se në Gaza uji i pastër po mbaron me shpejtësi. 

“Ka vetëm një impiant shkripëzimi në funksion dhe ai po punon me vetëm 5% të kapacitetit, ndërsa të gjashtë impiantet e trajtimit të ujërave të zeza të Gazës janë tani jofunksionale për mungesë karburanti apo energjie elektrike”, theksoi Russell. 

Sipas saj, mungesa e ujit të pastër dhe e shërbimeve të sigurta higjieno-sanitare janë në prag të krijimit të një katastrofe, raporton “ATSH”. 

“Nëse qasja për ujë të pastër nuk përmirësohet urgjentisht, atëherë gjithnjë e më shumë civilë, përfshirë fëmijët, do të sëmuren ose do të vdesin nga dehidratimi apo sëmundjet e shkaktuara nga uji”, theksoi Russell. (Elona)