Foto nga MPJ

I dërguari i posaçëm i Kinës për çështjen e Lindjes së Mesme të hënën theksoi rëndësinë e krijimit të kushteve për të rifilluar procesin e paqes në Lindjen e Mesme në bazë të zgjidhjes me dy shtete dhe parimit "tokë për paqe".

Zhai Jun, i dërguari i posaçëm i qeverisë kineze për çështjen e Lindjes së Mesme, i bëri këto komente gjatë një takimi me Ayman Safadi, zv-kryeministrin dhe ministrin e Jashtëm të Jordanisë, në bisedimet e fundit të tij me diplomatët rajonalë që nga shpërthimi i konfliktit midis palestinezëve dhe izraelitëve.

Kina është "thellësisht e shqetësuar" për përkeqësimin e krizës humanitare në Gaza, tha Zhai, i cili i kërkoi komunitetit ndërkombëtar, veçanërisht Këshillit të Sigurimit të OKB-së, të veprojë dhe të marrë masa konkrete për të promovuar armëpushimin  dhe përfundimin e armiqësive sa më shpejt të jetë e mundur. .

“Në të njëjtën kohë, ne duhet të kemi një këndvështrim afatgjatë dhe të krijojmë kushte për rifillimin e procesit të paqes në Lindjen e Mesme në bazë të zgjidhjes me dy shtete dhe parimit ‘tokë për paqe’”, tha ai.

Çështja e tokës është në thelb të konfliktit palestinezo-izraelit. Sipas Komisionit Ekonomik dhe Social të OKB-së për Azinë Perëndimore, për një kohë të gjatë përpjekjet që synonin arritjen e një zgjidhjeje të konfliktit bazoheshin në parimin "tokë për paqe".

Parimi "tokë për paqe" do të thotë që nëse Izraeli tërhiqet nga territoret e pushtuara arabe, duke përfshirë tokën e pushtuar palestineze, arabët do të bëjnë paqe me Izraelin, sipas Komisionit Ekonomik dhe Social të OKB-së për Azinë Perëndimore.

Safadi tha se konflikti palestinezo-izraelit ka sjellë dëme të mëdha në Gaza dhe ka ndikuar në sigurinë dhe stabilitetin rajonal.

Shkaku kryesor i konfliktit qëndron në privimin e të drejtave legjitime kombëtare të popullit palestinez, shtoi Safadi.

Vetëm duke kuptuar në mënyrë korrekte dhe gjithëpërfshirëse kontekstin historik të çështjes palestineze mund të gjendet zgjidhje politike për këtë çështje, tha ai. (Çang Çuo)