Mbi 500 ekspertë dhe studiues nga Kina dhe jashtë vendit u mblodhën në Forumin e 7-të Global për Shkencën dhe Teknologjinë Bujqësore (GLAST-2023), për të shkëmbyer ide mbi promovimin e zhvillimit të qëndrueshëm bujqësor përmes inovacionit teknologjik, përcjell “Xinhua”.
Forumi dyditor, i cili u zhvillua në Sanya, në provincën Hainan të Kinës jugore, ishte me temë: “Shkenca dhe teknologjia që udhëheqin transformimin e sistemit global agro-ushqimor”.
“Vitet e fundit, shkalla e kontributit të përparimit shkencor dhe teknologjik bujqësor në Kinë u rrit në mënyrë të qëndrueshme dhe kapaciteti gjithëpërfshirës i prodhimit bujqësor u përmirësua ndjeshëm”,- deklaroi Wu Kongming, president i Akademisë Kineze të Shkencave Bujqësore (CAAS).
Ai theksoi se CAAS është e përkushtuar për të nxitur vazhdimisht bashkëpunimin ndërkombëtar, duke ofruar zgjidhje të orientuara nga inovacioni dhe duke ndërtuar një sistem prodhimi bujqësor më efikas, gjithëpërfshirës dhe të qëndrueshëm.
Li Jinxiang, zyrtari kryesor veterinar i Ministrisë së Bujqësisë dhe Çështjeve Rurale, theksoi në forum rëndësinë e përpjekjeve bashkëpunuese në inovacionin e shkencës dhe teknologjisë për të promovuar transformimin e sistemit global agro-ushqimor.
“Një forum global si GLAST mund të luajë një rol kryesor për të siguruar që shkenca dhe teknologjia të drejtojnë këtë transformim”,- deklaroi në një fjalim video Qu Dongyu, drejtor i përgjithshëm i Organizatës së Kombeve të Bashkuara për Ushqimin dhe Bujqësinë (FAO).
Pjesëmarrësit nga më shumë se 50 vende diskutuan tema të ndryshme, si përmirësimi i produktivitetit bujqësor, teknologjitë më të fundit, rivitalizimi rural dhe zhvillimi i pronarëve të vegjël, duke kërkuar një partneritet shumë më të ngushtë dhe më të përqafuar inovacionin shkencor dhe teknologjik bujqësor.
Organizuar së bashku nga CAAS, qeveria e provincës Hainan, FAO, Grupi Konsultativ për Kërkimin Ndërkombëtar Bujqësor dhe Agjencia Ndërkombëtare e Energjisë Atomike, forumi synon të promovojë dialogun midis instituteve ndërkombëtare në shkencën dhe teknologjinë bujqësore. (Irma)
