Foto nga VCG
Rreth 300 shkencëtarë të bujqësisë dhe përfaqësues nga e gjithë bota u mblodhën në Pekin për Konferencën Ndërkombëtare mbi Bujqësinë e Tokës së Thatë.
Qëllimi i konferencës ishte promovimi i shkencës dhe teknologjisë në ndërtimin e një ekosistemi elastik të tokës së thatë dhe garantimin e sigurisë ushqimore, shkruan “Xinhua”.
Konferenca, e mbajtur nga Akademia Kineze e Shkencave Bujqësore (CAAS), Organizata e Ushqimit dhe Bujqësisë e Kombeve të Bashkuara dhe Grupi Konsultativ për Kërkimin Ndërkombëtar Bujqësor, synon të përmirësojë kërkimin dhe inovacionin global në bujqësinë e tokës së thatë.
Wu Kongming, president i CAAS, tha se zhvillimi i qëndrueshëm i bujqësisë së tokës së thatë është thelbësor për garantimin global të ushqimit dhe sigurisë ushqimore, mbrojtjen e mjedisit ekologjik, zhdukjen e varfërisë dhe përmirësimin e jetesës së njerëzve.
Statistikat tregojnë se toka e thatë përbën më shumë se 80 për qind të tokës së punueshme në botë, duke mbuluar më shumë se 100 vende. Bujqësia e tokës së thatë siguron 60 për qind të të korrave në botë dhe mbështet 50 për qind të prodhimit blegtoral.
Wu theksoi se aktualisht bujqësia globale përballet me shumë sfida, si ndryshimi i klimës, fatkeqësitë natyrore të intensifikuara, degradimi i burimeve të tokës dhe ujit, rritja e kërkesës për ushqim dhe një popullsi e madhe që vuan nga uria dhe kequshqyerja.
Sipas tij, CAAS ka krijuar marrëdhënie bashkëpunimi me mbi 100 vende dhe rajone, si dhe organizata ndërkombëtare, dhe do të punojë ngushtë me homologët e saj vendas dhe të huaj, për të promovuar zhvillimin e qëndrueshëm të bujqësisë së tokës së thatë. (Irma)
