Flamuj të BE-së (Foto Panorama)

Polonia duhet të sqarojë akuzat se konsullatat e saj në Afrikë dhe Azi u shitën viza të përkohshme pune emigrantëve për mijëra dollarë secila në një skemë që mund të minojë udhëtimin e lirë në Evropë.

Zëvendëspresidenti i Komisionit Evropian, Margaritis Schinas, tha se udhëtimi i lirë brenda zonës së 27 shteteve me verifikim të identitetit e njohur si zona Shengen, mbështetet në besimin midis anëtarëve, të cilët përfshijnë shumicën e vendeve të BE-së, plus Islandën, Lihtenshtajnin, Norvegjinë dhe Zvicrën, shkruan “RTSH”

“Ajo që ndodh në një shtet Shengen ndikon në funksionimin e të gjitha vendeve të Shengenit. Kjo është arsyeja pse rastet e pretenduara të mashtrimit dhe korrupsionit në sistemin polak të vizave janë jashtëzakonisht shqetësuese”,- u tha Schinas ligjvënësve të BE-së në Strasburg.

“Nëse shtetasve të vendeve të treta u është lejuar e drejta e lëvizjes së lirë brenda Shengenit, pa respektuar kushtet dhe procedurat e duhura, kjo do të përbënte shkelje të ligjit të BE-së, veçanërisht kodit të vizave të BE-së”,- tha ai.

Vërejtjet e Schinas vijnë pikërisht në kohën kur partia e djathtë në pushtet e Polonisë po bën fushatë për zgjedhjet e 15 tetorit. Emigracioni është një temë e nxehtë zgjedhore dhe partia në pushtet po përballet me pyetje në lidhje me skemën e supozuar, pasi kërkon edhe një mandat të tretë. Autoritetet polake, duke përfshirë kreun e partisë në pushtet, këmbëngulin se nuk ka skandal. Ata thonë se nga hetimet që po vazhdojnë janë arrestuar shtatë persona dhe se ka pasur më pak se 300 raste të parregullsive. (Elona)