Senati amerikan (Foto Rtsh)

Senati amerikan miratoi me 88 vota pro dhe 9 kundër një projektligj që do të mbajë të financuar qeverinë amerikane deri më 17 nëntor, por ku nuk përfshihet mbështetja e re për Ukrainën, duke shmangur mbylljen e qeverisë federale, shkruan “RTSH”.

Propozimi u bë nga kryetari i Dhomës së Përfaqësuesve, Kevin McCarthy, i cili u përball me kundërshtime të mëdha nga ligjvënësit e ekstremit të djathtë brenda partisë së tij.

Republikanët në Dhomën e Përfaqësuesve miratuan një financim të përkohshëm, i cili do ta mbajë qeverinë të hapur deri në mes të muajit nëntor.

Presidenti Joe Biden e nënshkroi marrëveshjen duke e kthyer në ligj pak para se të skadonte afati në mesnatë.

Kreu i Shtëpisë së Bardhë e cilësoi si një lajm të mirë për popullin amerikan.

Nëse do të ndodhte mbyllja e qeverisë amerikane, nga 1 tetori dhjetëra mijëra punonjës federalë do të shkonin në pushime pa pagesë dhe njëkohësisht do të pezulloheshin shërbime të ndryshme qeveritare. (Fatosi)