Kompania kineze e teknologjisë “Xiaomi Corp” do të investojë 20 miliardë juanë (2.7 miliardë dollarë) në kërkim dhe zhvillim këtë vit, në një përpjekje për t’u përfshirë në tregun e telefonave inteligjentë të nivelit të lartë, të mbështetur nga inteligjenca artificiale, ku konkurrentët, duke përfshirë “Honor”, “Oppo” dhe “Vivo”, po përpiqen të zgjerojnë praninë, pavarësisht nga ajo që ekspertët e quajnë "progres i kufizuar" deri tani. Shefi ekzekutiv i kompanisë “Xiaomi”, Lei Jun, ka thënë se kjo është e vetmja mënyrë që “Xiaomi” të rritet dhe e ka përshkruar atë "si një betejë mes jetës dhe vdekjes".
foto: VCG
Gjatë një fjalimi në Pekin të hënën, Lei tha se kompania po punon shumë për të mprehur fuqinë e saj teknologjike, në fusha të tilla si imazhet celulare dhe inteligjenca artificiale.
"Xiaomi” përqafon plotësisht kërkimin mbi modelet e mëdha gjuhësore të inteligjencës artificiale dhe modeli më i fundit me 1.3 miliardë parametra është ekzekutuar me sukses në nivel lokal në telefonat celularë, me disa skenarë të krahasueshëm me modelin me 6 miliardë parametra që funksionojnë në teknologjinë “Cloud”",- tha Lei.
Modelet e mëdha gjuhësore janë teknologjia kryesore pas “ChatGPT” jashtëzakonisht të popullarizuar, një “chatbot” i inteligjencës artificiale, i zhvilluar nga kompania kërkimore e inteligjencës artificiale me bazë në SHBA, “OpenAI”.
Lei tha se asistenti me zë i inteligjencës artificiale i aktivizuar i kompanisë është përmirësuar për të mbështetur një model të madh gjuhësor dhe përdoruesit janë ftuar të marrin pjesë në teste.
Ai tha se “Xiaomi” është angazhuar në kërkime të inteligjencës artificiale që nga korriku 2016 dhe se kompania kishte krijuar një ekip në prill të këtij viti për kërkimin dhe zhvillimin e një modeli të madh gjuhësor. Aktualisht, kompania ka mbi 3,000 punonjës që punojnë në kërkime të lidhura me inteligjencën artificiale.
foto: VCG
“Huawei Technologies Co”, biznesi i telefonave inteligjentë të të cilit është në një shteg rikthimi pasi u ndrydh nga kufizimet e qeverisë amerikane që nga viti 2019, shfaqi gjithashtu aplikacionet e saj të fuqizuara nga modelet e mëdha gjuhësore në fillim të këtij muaji. Ndihmësi i inteligjencës artificiale i “Huawei”, “Celia”, për shembull, mund të përkthejë shpejt një raport lajmesh angleze prej 3000 fjalësh në kinezisht, të shkruajë një përmbledhje dhe të sigurojë të dhëna përkatëse për lexuesit që ta kuptojnë më mirë raportin.
“Honor Device Co Ltd” tha gjithashtu në qershor se po eksploron mundësinë e përdorimit të modeleve të mëdha gjuhësore të inteligjencës artificiale në pajisje. Kompanitë kineze të telefonave inteligjentë po e shohin zhvillimin e modeleve të mëdha gjuhësore në pajisje si një aspekt të rëndësishëm për të ndërtuar një imazh të nivelit të lartë, tha Lu Yanxia, drejtor kërkimi në “IDC China”.
Sidoqoftë, suksesi i modeleve të mëdha gjuhësore varet shumë nga fuqia kompjuterike pasi modelet e mëdha gjuhësore zakonisht kërkojnë trajnim me triliona fjalë, gjë që është ende një sfidë për telefonat inteligjentë.
Por me prodhuesit vendas të telefonave që investojnë në këtë fushë, aplikimi i modeleve të mëdha gjuhësore në telefonat inteligjentë do të krijojë mundësi të reja, tha Lu.
foto: VCG
Ndërkohë, “Xiaomi” zbuloi vonë të hënën qenin e tij të fundit robot me katër këmbë “CyberDog 2”, i cili mund të qëndrojë mbi njërën këmbë, si pjesë e përpjekjeve për të ndërtuar imazhin e tij premium.
“Xiaomi” ka përmirësuar lëvizshmërinë e qenve kibernetikë me mikro-aktivizuesit e vetëzhvilluar “CyberGear”, të cilët e bëjnë robotin më të shkathët dhe të aftë për të kryer manovra të ndërlikuara, të tilla si rrokullisjet e vazhdueshme dhe ringritja pas një rrëzimi.
