Në një zonë që përfshin mbi 14.000 km katrorë, duhen vetëm disa sekonda për të gjurmuar një tigër të egër siberian, falë më shumë se 20.000 kamerave me infra të kuqe të instaluara në Parkun Kombëtar të Tigrit dhe Leopardit në Kinën verilindore.

I ndodhur në provincat Jilin dhe Heilongjiang të Kinës verilindore, parku u testua në vitin 2017 dhe u krijua zyrtarisht në vitin 2021. Ai është i pajisur me kamera me infra të kuqe dhe një sistem monitorimi inteligjent të integruar, që mbulon të gjithë zonën, për të mbledhur dhe regjistruar të dhëna për jetën e egër.

Ndërsa shëtiti nëpër zonë, Zang Peng,  një rojtar në zyrën Suiyang të administratës së parkut, ndaloi përpara një pishe të kuqe të lartë. Më pas nxori një kuti hekuri të gjelbër nga çanta e shpinës.

foto: Xinhua

“Kjo është kamera me infra të kuqe që ne përdorim për të gjurmuar aktivitetet e kafshëve të egra.

Nëse një tigër siberian kalon pranë kamerës, sinjali i tij me infra të kuqe do ta ndezë pajisjen dhe do të fillojë të regjistrojë video nga afër”,- tha Zang, i cili theksoi se këto kamera përbëjnë bazën për gjurmimin dhe mbrojtjen e tigrave siberianë.

I njohur gjithashtu si tigri Amur, tigri siberian është një nga kafshët më të rrezikuara në botë dhe një specie kryesore e ekosistemit pyjor që jeton kryesisht në Lindjen e Largët të Rusisë dhe Kinën verilindore.  Rreth 500 tigra siberianë besohet se jetojnë në natyrë. Vitet e fundit, janë prezantuar teknologji të ndryshme për të mbështetur mbrojtjen e tigrave siberianë në parkun e kafshëve të egra, duke ndihmuar në rindërtimin e mbretërisë së felinit të fuqishëm.

Kur Zang filloi karrierën e tij si rojtar gjashtë vjet më parë, një nga detyrat më vendimtare dhe rraskapitëse ishte pastrimi i kurtheve dhe grupeve të gjuetisë. Pylli ishte i mbushur me kurthe të shumta gjuetie, pasi disa vendas më parë mbështeteshin në gjuetinë e kafshëve të egra për jetesën e tyre.  Tani, me sistemin SMART në funksion, i cili integron informacione të ndryshme gjeografike, pastrimi i kurtheve është bërë shumë më i lehtë për Zang-un dhe kolegët e tij.

foto: VCG

“Duke përdorur sistemin SMART, ne mund të ngarkojmë dhe analizojmë vendndodhjet e gjurmëve të kafshëve dhe kurtheve të gjuetisë, dhe informacione të tjera pas patrullimit, duke mos lënë asnjë pikë qorre pas”,- tha Zang.

Ndërsa parku kthehet në një vend shumë më të sigurt për kafshët, popullsia e tigrave siberianë është rritur vazhdimisht gjatë viteve të fundit. Në kuadër dhe të Ditës Ndërkombëtare të Tigrit, që festohet më 29 korrik, këtë vit numërohen rreth 60 tigra të egër siberianë në Kinë, duke u rritur nga rreth 20 në vitet 1990, bëri të ditur Administrata Kombëtare e Pyjeve dhe Kullotave.

Në juridiksionin e degës së zyrës Suiyang të parkut, kamerat me infra të kuqe kanë kapur imazhe të tigrave të egër siberianë 415 herë, me 10 individë të rritur të pikasur.  Në zonën Tianqiaoling të parkut në provincën Jilin, studiuesit u befasuan kur gjetën një tigër siberian femër me katër këlyshë të shëndetshëm që endeshin në pyll.

Por, me rritjen e numrit të tigrave siberianë vjen edhe rreziku në rritje për rojet patrulluese dhe banorët vendas. Me aktivitetet në rritje të grabitqarëve të egër, parku filloi të krijojë një sistem paralajmërimi të hershëm për të parandaluar konfliktet njeri-tigër përmes përdorimit të teknologjisë. Sistemi i paralajmërimit të hershëm është një pjesë e sistemit të integruar të monitorimit inteligjent, i cili mbledh të dhëna në kohë reale për aktivitetet e kafshëve të kapura nga kamerat me infra të kuqe, si dhe burimet natyrore si uji, toka dhe ajri.

foto: VCG

Në qendrën e monitorimit, diagramet që shfaqin frekuencën e aktivitetit dhe kohën aktive të tigrave siberianë projektohen në ekran brenda disa sekondave. Sistemi gjithashtu mund të njohë automatikisht lloje të ndryshme të kafshëve të egra, duke përfshirë dhe tigrin siberian.

Liang Zhuo,  zëvendësdrejtor i departamentit të mbrojtjes së tigrave të Siberisë në degën e zyrës Suiyang të parkut, tha se përmes këtij sistemi, ata mund t'u dërgojnë mesazhe banorëve lokalë sapo tigrat të dallohen afër fshatit ose tokës bujqësore.

Sistemi inteligjent ka rezultuar në uljen e punës manuale dhe më pak ndërhyrje njerëzore në jetën e tigrave të egër siberianë, si dhe ka ndihmuar në ndërtimin e një baze të dhënash të tigrave siberianë, e cila mund të sigurojë të dhëna bazë për punën kërkimore shkencore dhe mbrojtjen.

Me integrimin e vazhdueshëm të përparimeve teknologjike në zhvillimin e parkut, tigrat siberianë po përjetojnë një kulm në riprodhim dhe një rritje të shpejtë të popullsisë. Ekspertët besojnë se të paktën 50 për qind e këlyshëve të këtij lloj tigrit tani mund të mbijetojnë deri në moshën madhore në park.