Foto nga VCG

Planifikuesi kryesor ekonomik i Kinës publikoi një sërë masash për të rritur konsumin, mes përpjekjeve për të mbështetur rimëkëmbjen ekonomike dhe për të promovuar zhvillimin me cilësi të lartë, njofton “Xinhua”.

Vendi u zotua të nxisë konsumin e një game të gjerë artikujsh dhe shërbimesh, duke përfshirë automjetet me energji të re (NEV), pajisjet shtëpiake, elektronikë, hotelieri, sektorët e kulturës dhe turizmit, si dhe atë në zonat rurale. Ai gjithashtu u zotua të mbështesë kërkesën e ngurtë për strehim dhe përmirësimin e jetesës, sipas një njoftimi të publikuar nga Komisioni Kombëtar i Zhvillimit dhe Reformës (NDRC).

“Autoritetet lokale nuk duhet të marrin masa të reja për të kufizuar blerjen e automjeteve, ndërsa rajonet që kanë pasur tashmë masa kufizuese për blerjen e automjeteve duhet t'i përmirësojnë këto masa në mënyrë që t'u përshtaten kushteve lokale”,- thuhet në njoftimin e NDRC-së.

Sipas njoftimit, duhet të bëhen përpjekje për të ndërtuar një infrastrukturë tarifimi me cilësi të lartë, për të promovuar përdorimin e makinave me energji të re në zonat rurale dhe për të ruajtur dhe përmirësuar stimujt e favorshëm tatimorë për blerjen e tyre.

Planifikuesi ekonomik shtetëror nxiti gjithashtu konsumin e pajisjeve shtëpiake duke hapur tregtimin dhe riciklimin e pajisjeve shtëpiake të përdorura, thuhet në njoftim.

Sipas komisionit, këto masa, të miratuara nga Këshilli i Shtetit, synojnë zbatimin më të mirë të strategjisë së zgjerimit të kërkesës së brendshme, duke i dhënë prioritet rolit themelor të konsumit në stimulimin e rritjes ekonomike dhe ruajtjen e zhvillimit cilësor të vendit. (Fatosi)