Foto nga VCG

Hetuesit ndërkombëtarë kryen një operacion në shkallë të gjerë kundër anëtarëve të organizatës mafioze italiane “Ndrangheta” njëkohësisht në Gjermani, Belgjikë, Francë, Itali, Portugali dhe Spanjë.

Në total, u ndaluan 132 anëtarë të Ndrangheta-s, citon “Xinhua”. Sipas Europol-it, organizata e stilit mafioz është përgjegjëse për pjesën më të madhe të tregtisë së drogës në Europë, e kombinuar me pastrimin sistematik të parave, ryshfetin dhe dhunën.

Vetëm në Gjermani, më shumë se 1000 oficerë policie, përfshirë njësitë speciale, kryen kontrolle në rreth 100 prona, u bë e ditur në një deklaratë të përbashkët nga zyrat e prokurorisë publike dhe departamentet e hetimit penal të shteteve federale.

Rreth 30 urdhërarreste u zbatuan gjatë bastisjeve në Gjermani. Të dyshuarit akuzohen për pastrim parash, evazion fiskal në grup, mashtrim me bandë komerciale dhe kontrabandë narkotikësh.

Operacioni ndërkombëtar u drejtua nga një ekip i përbashkët hetimor që përfshinte gjithashtu Europol, agjencinë e Bashkimit Europian për bashkëpunimin për zbatimin e ligjit, dhe Eurojust, agjencia e bllokut për bashkëpunimin në drejtësinë penale.

“Qëllimi i kontrolleve ishte gjetja e provave. Hetimet, veçanërisht vlerësimi i provave të gjetura, po vazhdojnë”,- thanë autoritetet.

“Operacioni ishte një goditje efektive kundër strukturave kriminale të “Ndrangheta”. Tashmë ka një sinjal shumë të qartë, nuk ka vend për krimin e organizuar në Europë”,- shkroi në “Twitter” ministri i Brendshëm i Rheinland-Pfalz, Michael Ebling.  (Irma)