Foto nga VCG

Tre persona u plagosën pasi një tërmet me magnitudë 5.2 u regjistrua në qytetin Baoshan në provincën Yunnan të Kinës jugperëndimore të martën në mbrëmje.  

Autoritetet lokale kanë aktivizuar një reagim emergjent të nivelit III dhe kanë dërguar ekipet e shpëtimit në zonën e katastrofës, shkruan “China Daily”.  

Tërmeti goditi rrethin Longyang të Baoshan në orën 23:27 (koha lokale). Sipas një raporti lokal, tre kanë pësuar lëndime të lehta nga tërmeti dhe janë dërguar në spital për trajtim mjekësor. Ata janë të gjithë jashtë rrezikut për jetën.  

Tërmeti ka shkaktuar dëme të shkallëve të ndryshme në shtëpitë e banimit dhe infrastrukturën brenda dhe përreth zonës së epiqendrës, tha Zhang Yunyi, nënkryetari i bashkisë së Baoshan, në një konferencë për shtyp të mbajtur të mërkurën në mëngjes.  

Mbi 2400 njerëz janë dërguar në zonën e katastrofës për të kryer operacionet e kërkim-shpëtimit. Gjithsej 365 tenda, 734 shtretër të palosshëm dhe 1470 jorganë pambuku janë ndarë në zonat e prekura, shtoi Zhang.  

Komuna Wayao, Shuizhai Township dhe Banqiao Township, të gjitha të administruara nga distrikti Longyang, janë ndër më të prekurat. Aktualisht, 2805 shtëpi në të tre zonat janë dëmtuar dhe më shumë se 11.000 banorë vendas janë zhvendosur në vende më të sigurta.  

Shtabi i ndihmës në Baoshan do të vazhdojë të monitorojë situatën dhe të identifikojë rreziqet e mundshme të fatkeqësive gjeologjike, duke siguruar njëkohësisht aksesin e duhur në energjinë elektrike, komunikimin dhe trafikun në zonat e prekura për të rivendosur rendin lokal të punës dhe prodhimit sa më shpejt të jetë e mundur. (Elona)