Kina ishte partneri më i rëndësishëm tregtar i Portit të Hamburgut, porti më i madh universal i Gjermanisë, në vitin 2022, duke regjistruar vetëm një rënie të lehtë të xhiros së kontejnerëve në det, njoftoi “Port of Hamburg Marketing” (HHM), shkruan “Xinhua”.

Me 2.46 milionë njësi ekuivalente prej njëzet TEU, Kina ishte partneri tregtar numër një i portit me një diferencë të gjerë, bëri të ditur kompania në një deklaratë.

“Një pjesë e transportit të kontejnerëve me Kinën, trajtuar përmes Hamburgut, i atribuohet transportit me Rusinë. Këto vëllime kanë munguar në krahasim me një vit më parë. Ne shpresojmë që transporti midis Kinës dhe Hamburgut do të vazhdojë të stabilizohet”,- deklaroi një zëdhënës i “HHM”.

Grupet më të rëndësishme të produkteve të importuara nga Kina dhe të trajtuara në portin e Hamburgut përfshinin makineri, kimikate dhe metale. Produktet e drurit, ushqimet dhe automjetet, nga ana tjetër, ishin ndër mallrat që transportoheshin shpesh në Kinë, sipas “HHM”-së.

Kina ka qenë partneri më i rëndësishëm tregtar i Gjermanisë për shtatë vjet me radhë. Në vitin 2022, vëllimi i përgjithshëm i tregtisë midis dy vendeve u rrit 20.9 për qind nga viti në vit në 297.9 miliardë euro (318.8 miliardë dollarë amerikanë), sipas Zyrës Federale të Statistikave (Destatis).

Industria e rëndësishme e automobilave në Gjermani nuk bën përjashtim. Vitin e kaluar, prodhuesi më i madh i makinave në vend, “Volkswagen”, dërgoi afro 3.2 milionë automjete në Kinë, pothuajse katër herë më shumë se në tregun e saj të dytë më të madh të vetëm, Shtetet e Bashkuara.

“Ekonomia kineze është shumë e madhe për t'u shkëputur plotësisht nga ajo. Askush nuk e dëshiron këtë dhe nuk do të kishte kuptim”,- ka deklaruar Juergen Matthes, ekspert në Institutin Ekonomik Gjerman (IW). (Elona)