Foto nga VCG
Kombet e Bashkuara po përshkallëzojnë me shpejtësi përpjekjet e ndihmës humanitare në zonat e Sirisë dhe Turqisë të prekura nga tërmetet shkatërruese të javës së kaluar me më shumë ndihma dhe apelojnë për rritje të fondeve dhe koordinim më të ngushtë në të gjithë sistemin, shkruan “Xinhua”.
Fondi i OKB-së për Fëmijët (UNICEF) ka ndihmuar në ofrimin e suplementeve të mikronutrientëve për 113.000 fëmijë nën moshën 5 vjeç dhe 1000 gra shtatzëna dhe për ato që ushqejnë me gji për tre muaj, deklaroi Stephane Dujarric, zëdhënës i shefit të OKB-së Antonio Guterres.
Programi Botëror i Ushqimit (WFP) ka shpërndarë ushqime të gatshme dhe artikuj të tjerë ushqimorë për familjet e zhvendosura në të gjithë provincat Alepo, Hama, Latakia dhe Idlib në Siri, u tha Dujarric gazetarëve.
Përgjigjja ndërkufitare vazhdoi të mërkurën, me 30 kamionë nga WFP-ja, që mbanin ushqim të konservuar dhe dyshekë, duke kaluar në veriperëndim të Sirisë përmes vendkalimit Bab al-Hawa.
Organizata Ndërkombëtare për Emigracionin gjithashtu dërgoi sende strehimi dhe joushqimore përmes vendkalimit Bab al-Salam, tha ai.
Sipas zëdhënësit, deri më 9 shkurt, gjithsej 117 kamionë kaluan në veriperëndim të Sirisë, me 106 përmes vendkalimit Bab al-Hawa dhe 11 përmes vendkalimit Bab al-Salam.
OKB-ja njoftoi se Siria vendosi të hapë dy pika kalimi të tjera të Bab al-Salam dhe Al Ra'ee nga Turqia në veriperëndim të Sirisë për një periudhë fillestare prej tre muajsh për dërgimin e ndihmave humanitare.
Para tërmeteve, Bab al-Hawa ishte i vetmi vendkalim përmes të cilit ndihma e OKB-së u lejua të shkonte në Sirinë veriperëndimore.
Dujarric tha se WFP-ja planifikon të dërgojë edhe 40 kamionë të tjerë në dy ditët e ardhshme, duke përdorur potencialisht pikat e reja kufitare.
WFP-ja ka rifilluar programin e saj të rregullt të ndihmës ushqimore me shpërndarjen e shportës së ushqimit për 170.000 njerëz në zonat e kontrolluara nga qeveria në veriperëndim të Sirisë, përveç ofrimit të racioneve ushqimore urgjente për 100.000 njerëz, tha zëdhënësi.
Si një lëvizje e madhe për të shkallëzuar operacionet e ndihmës, Guterres njoftoi të martën se organizmi botëror po niste një apel humanitar për 397 milionë dollarë amerikanë për njerëzit e Sirisë së goditur nga tërmeti.
Përpjekja bashkon të gjithë sistemin e OKB-së dhe partnerët humanitarë dhe do të ndihmojë në sigurimin e ndihmës dëshpërimisht të nevojshme, shpëtimtare për gati 5 milionë sirianë, duke përfshirë strehimin, kujdesin shëndetësor, ushqimin dhe mbrojtjen, tha Guterres, i cili theksoi se një apel i ngjashëm po bëhet edhe për Turqinë.
Menjëherë pas tërmeteve, Kombet e Bashkuara siguruan me shpejtësi 50 milionë dollarë përmes Fondit Qendror të Përgjigjes ndaj Emergjencave.
Në një përpjekje tjetër për të rritur reagimin e OKB-së, Dujarric tha se drejtorët e Komitetit të Përhershëm Ndër-Agjencior, i cili mbledh së bashku OKB-në dhe partnerët e saj humanitar, kanë deklaruar një rritje të sistemit humanitar për gjashtë muaj.
“Kjo ndihmon për të siguruar që ne jemi duke vendosur kolektivisht dhe operacionalisht të gjitha mjetet dhe burimet e mundshme për të reaguar urgjentisht në zonat e prekura nga tërmeti," tha ai.
Komiteti i Përhershëm Ndër-Agjencior është një forum koordinues humanitar i sistemit të OKB-së. Ai mbledh së bashku krerët ekzekutivë të 18 organizatave dhe konsorciumeve, me anëtarë nga brenda dhe jashtë Kombeve të Bashkuara, për të formuluar politika, për të vendosur prioritete strategjike dhe për të mobilizuar burimet në përgjigje të krizave humanitare. (Irma)
