Foto:VCG
Një zyrtar i lartë palestinez deklaroi se qeveria e re izraelite e formuar nga kryeministri Benjamin Netanyahu kohët e fundit po zëvendëson paqen dhe zgjidhjen me dy shtete me aneksimin dhe vendbanimet, shkruan “Xinhua”.
Ahmad Majdalani, anëtar i komitetit ekzekutiv të Organizatës për Çlirimin e Palestinës, tha për “Zërin e Palestinës” se procesi i paqes dhe opsioni i zgjidhjes me dy shtete nuk janë më në axhendën e qeverisë së re izraelite.
Sipas tij, qeveria e ekstremit të djathtë ka zëvendësuar si procesin e paqes në Lindjen e Mesme ashtu edhe zgjidhjen me dy shtete për të zgjidhur problemin izraelito-palestinez me aneksim, vendbanim dhe spastrim etnik.
Të premten, Netanyahu, kryeministri më jetëgjatë i Izraelit, njoftoi se ai ka arritur të formojë një qeveri koalicioni me disa parti të tjera të vijës së ashpër dhe ultra-ortodokse.
Foto:VCG
“Marrëveshjet e koalicionit të arritura midis Netanyahut dhe liderëve të partive të krahut të djathtë izraelit janë një revolucion themelor dhe madhor në natyrën e qeverisjes dhe politikës”,- tha Majdalani.
Netanyahu dhe blloku i tij i krahut të djathtë fituan shumicën e votave në zgjedhjet parlamentare të nëntorit, të cilat erdhën pas gati katër vitesh zgjedhjesh jopërfundimtare.
Majdalani paralajmëroi se programi i qeverisë së re izraelite do të ndezë përsëri konfliktin dhe do ta nxisë atë, duke shtuar se udhëheqja palestineze nuk do të jetë e vetmja palë e përkushtuar ndaj marrëveshjeve të nënshkruara.
Bisedimet e fundit të drejtpërdrejta të paqes midis Izraelit dhe palestinezëve përfunduan në mars 2014, pasi Shtetet e Bashkuara i sponsorizuan ato për nëntë muaj pa bërë asnjë përparim për shkak të dallimeve të rëndësishme rreth vendbanimeve dhe kufijve shtetërorë palestinezë.
Foto:VCG
Palestinezët duan të krijojnë një shtet palestinez në territoret e pushtuara nga Izraeli në vitin 1967, duke përfshirë Bregun Perëndimor dhe Rripin e Gazës, me Jeruzalemin Lindor si kryeqytet. (Irma)