Foto nga VCG

Gjykata e Lartë e Mbretërisë së Bashkuar vendosi të mërkurën se Skocia nuk ka fuqinë për të mbajtur një referendum të ri për pavarësinë pa miratimin e Parlamentit të Mbretërisë së Bashkuar.

“Parlamenti skocez nuk ka fuqinë për të nxjerrë ligje për një referendum për pavarësinë skoceze”,- tha Robert Reed, kryetar i Gjykatës së Lartë të Mbretërisë së Bashkuar.

Në një referendum të mbajtur në vitin 2014, votuesit refuzuan pavarësinë e Skocisë, por nacionalistët skocezë argumentuan se Brexit-i pasues, të cilin shumica e votuesve skocezë e kundërshtuan, ndryshoi mendimin për pavarësinë skoceze, citon “Xinhua”.

Qëkur partitë që mbrojnë pavarësinë e Skocisë u bënë shumicë në parlamentin skocez në vitin 2021, qeveria skoceze ka dyfishuar kërkesën për pavarësi. Ajo njoftoi në fillim të këtij viti se donte të thërriste një referendum në tetor 2023.

Kryeministrja e Skocisë, Nicola Sturgeon, tha se ishte e zhgënjyer nga vendimi. (Elona)